Amérika dölet mejlisining bir ezasi prézidént bushqa teywen mesilisi heqqide xet yazdi

Amérika dölet mejlisining awam palata ezasi tam tankrido, yéqinda prézidént bushqa xet yézip, amérika prézidéntining kéler hepte xitay dölet re'isi xu jintaw bilen uchrashqanda, xitay hökümiti bu yilning bashlirida teywen'ge bir tereplimilik qoral ishlitishke yol qoyudighan qanun chiqarghanliqigha diqqet qiliwatimiz, dep eskertishni telep qildi.

Tankrido, xitay da'im teywen'ge qoral ishlitish heqqide tehdit séliwatidu. Xitay hökümiti yéqinda chiqarghan "döletni parchilashqa qarshi turush qanuni" buning bir misali, dep tekitligen. U, prézidént bushning xu jingtawgha amérika 1979 - yili xitay bilen diplomatik munasiwet ornitishta, xitayning teywen mesilisini tinch yollar bilen hel qilish toghrisida bergen wedisige asaslan'ghanliqini eskertishni telep qilghan.

Tankrido, prézidéntning bu yil 1 - aydiki wezipe tapshuruwélish murasimida, amérika dunyadiki démokratiye we erkinlikni söyidighan kishiler terepte turidu, dégen sözini xatirlinip, " bu 23 milyon teywenlikni öz ichige élishi kérek," deydu.

Tankridoning tekitlishiche, xitay bilen bolghan munasiwetni dep teywenni qurban qiliwétishke bolmaydiken. U, buni béyjinggha bildürüsh kérek, deydu. Tankrido, bu yil 2 - ayda awam palatasigha teywen bilen diplomatik munasiwetni eslige keltürüsh toghrisida teklip layihisi sun'ghan. Emma bu dölet mejlisining küntertipike élinmighan idi. (Erkin)