Teywen amérikining agahlandurushigha uchridi

Teywen prézidénti chén shüybyen, döletni birlikke keltürüsh komitéti we programmisini bikar qilish mesilisini oylishidighanliqini jakarlighandin kéyin,amérika tashqiy ishlar ministirliqi teywen musteqilliqini qollimaydighanliqini we teywen boghizining hazirqi halitini özgertishke qarshi turidighanliqini bildürdi.

Prézidént chén shüybyen, 29- yanwar küni chaghan bayrimi munaswiti bilen söz ligen nutuqida, döletni birlikke keltürüsh komitéti we programmisini bikar qilish mesilisi üstide oylishidighanliqini eskertip, " teywen baturluq bilen özi tallighan yolda méngishi kérek " dep tekitligen idi. Chén shüybyenning eskertishiche, teywen bu yil ichide yéngi asasiy qanun layihisini tüzüp chiqip, kéler yili puqralarning awazigha qoyidiken. U, biz teywenning namida b d t gha eza bolushni aktip iltimas qilimiz, deydu.

Chén shüybyenning sözige béyjing da'iriliri inkas qayturushtin burun, amérika tashqiy ishlar ministirliqi inkas qayturup, amérikining "bir junggo siyasiti" ni tekitlidi. Amérika tashqiy ishlar ministirliqining bayanatida eskertishiche, amérika teywen musteqilliqini qollimaydiken, emma herqandaq bir terepning hazirqi haletni bir tereplimilik halda özgertishige qarshi turidiken.

Amérika tashqiy ishlar ministirliqi bayanatchisi adam ereliy, "bizning bu bayanatni élan qilishimizdiki seweb, biz küshkürtüsh xaraktérlik sözlerning bolushini yaki xata signal bérilishini xalimaymiz " deydu. Közetküchilerning ilgiri sürüshiche, amérika shimaliy koriye yadro qorallar mesilisini hel qilish basquchida, bolupmu iran yadro mesiliside xitayning qollishigha éhtiyaj boluwatqan bir chaghda, teywen mesilisining xitay - amérika otturisida sürkilish peyda qilishini xalimaydiken. (Erkin)