Stiwén: amérika yenila teywenning eng küchlük qollighuchisi

Amérikining teywendiki yuqiri derijilik bir déplomati peyshenbe küni amérikining yenila teywenning eng küchlük qollighuchisi ikenlikini bildürdi. Buning aldida amérikining chén shüybyenning amérikigha kirishini alaskida cheklep qoyushi seweblik, teywen da'iriliri azraq naraziliq bildürgen idi.

Yuqiridiki sözlerni amérikining teywendiki wekili stiwén yang qilghan bolup, u yene, " bizning arimizida xuddi dostlar arisida bolidighan bezi xapiliqlar boldi" dédi hemde buninggha teywen prézidénti chén shüybyenning bu qétim latin amérikisidiki sepiride amérika tupriqida toxtap ötmigenlikini misal qildi.

Stiwin yang yene, amérikining yenila teywenning eng küchlük qollighuchisi bolushni dawamlashturidighanliqini shundaqla amérikining yene teywen bilen élip baridighan nurghun sodilirining barliqini bildürdi. Emma u sözide yene, amérikining teywen musteqilliqighe qarshi turidighan meydanini tekitlep, bu musteqilliqning amérikini sörep kiridighan bir meydan urush peyda qilidighanliqini agahlandurdi.

Bu arida teywen prézidénti chén shüybyen latin amérikisidiki ziyaritini axirlashturghandin kéyin, liwiyige tuyuqsiz ziyaret qilip xitay hökümitining ghezipini qozghidi. Xitay tashqi ishlar ministiri buninggha naraziliq bildürüp, chénning liwiyidiki ziyaritining xitay-liwiye munasiwetlirige éghir ziyan yetküzidighanliqini tekitlidi hemde liwiyini tézdin teywen bilen bolghan barliq alaqini üzüshke ündidi.(Peride)