Америка билән хитай, хитайниң "бөлүнүшкә қарши қануни" ни музакирә қилди

Америка билән хитайниң юқири дәриҗилик әмәлдарлири чаршәнбә күни вашингитонда, хитай даирилири түзгән"бөлүнүшкә қарши қанун" ни музакирә қилди.

Америка ташқи ишлар министирлиқиниң баянатчиси әдәм әрилиниң билдүришичә, америкиниң муавин ташқи ишлар министири ричард армитич хитайниң тәйвән ишлири башқармисиниң мудири чин йүнлиң билән көрүшүп, "бөлүнүшкә қарши қанун" ни өз ичигә алған икки қирғақ мунасивити һәққидә сөһбәт өткүзгән.

Сөһбәттә ричард армитич, америкиниң мәйданини қайта тәкитләп, хитай билән тәйвәнниң тинич һалда диалог өткүзүш йоли билән ихтилабни һәл қилиши керәкликини көрсәткән. У йәнә, һәр иккила тәрәпни, һазирқи һаләтни өз алдиға өзгәртидиған вә вәзийәтни мурәккәпләштүридиған һәрикәт елип бериштин сақлинишқа чақиридиғанлиқини билдүргән.

Франсийә ахбарат агентлиқиниң хәвиригә қариғанда, хитайниң мәмликәтлик хәлқ қурултийи киләр йили 3 - айда мәзкүр қанун лаһийисини музакирә қилиду. Һалбуки хиай хәлқ қурултийиниң даимий һәйәт комитити болса өткән һәптә бу қарар лайиһисини тәстиқлиған.

Анализчилар, хитайниң "бөлүнүшкә қарши қануни" ни тәйвәнни мустәқиллиқ йолиға меңиштин чәкләшни нишан қилип түзгәнликини билдүргән. Тәйвән һөкүмити болса, хитай һөкүмитиниң мәзкүр қанунни түзүш арқилиқ тәйвәнгә һоҗум қилиш үчүн қануний асас яритишқа уруниватқанлиқини әйиплимәктә. (Арзу)