پرېزىدېنت بۇش خۇ جىنتاۋ بىلەن تېلېفوندا شىمالىي كورىيە ۋە تەيۋەن قاتارلىق مەسىلىلەرنى مۇزاكىرە قىلدى


2005.05.06
Share on WhatsApp
Share on WhatsApp

ئامېرىكا پرېزىدېنتى جورجى بۇش پەيشەنبە كۈنى خىتاي دۆلەت رەئىسى خۇ جىنتاۋ بىلەن تېلېفوندا سۆزلىشىپ، شىمالىي كورىيە يادرو قوراللار مەسىلىسىدىكى ئەندىشىلىرىنى شۇنداقلا بۇ يولدىكى 6 دۆلەت سۆھبىتىنى قوللايدىغانلىقىنى بىلدۈرگەن. ئاق ساراي، ئىككى دۆلەت رەھبىرىنىڭ تېلېفون سۆھبىتى شىمالىي كورىيە، تەنۋەن مەسىلىسى شۇنداقلا ئىقتىسادى ۋە سودا مەسىلىلىرىگە چېتىلغانلىقىنى بىلدۈردى.

ئاق ساراينىڭ باياناتچىسى مىكلىلان، " كورىيە يېرىم ئارىلىنى يادروسىزلاشتۇرۇش يولىدا داۋاملىق ھەمكارلىشىدىغانلىقىنى تەكىتلىگەن ئىككى رەھبەر، شىمالىي كورىيە مەسىلىسى پەۋقۇلاددە ئەندىشە يارىتىۋاتقانلىقىنى تىلغا ئالدى" دەپ كۆرسەتتى.

خىتاي ھازىرغا قەدەر شىمالىي كورىيە 6 دۆلەت سۆھبىتىنىڭ ئۈچ قېتىم ساھىپخانلىقىنى قىلدى. ئەمما ئامېرىكا خىتاينىڭ شىمالىي كورىيىنى سۆھبەت ئۈستىلىگە قايتۇرۇپ كېلىش يولىدا يىتەرلىك كۈچ چىقىشقا ئۇندىمەكتە.

بۇ ئارىدا ياپونىيىنىڭ "سانكېي شىمبۇن" گېزىتى، ياپونىيە بىلەن ئامېرىكا شىمالى كورىيە يادرو قوراللار مەسىلىسىنى خەۋپسىزلىك كېڭىشىنىڭ مۇزاكىرىسىگە قويۇش ئۈچۈن تەييارلىنىۋاتقانلىقىنى خەۋەر قىلدى. مىكلىلاننىڭ ئاشكارىلىشىچە، خۇ جىنتاۋ تەيۋەندىكى گومىنداڭ رەئىسى ليەن جەننىڭ خىتايدا ئېلىپ بارغان يېقىنقى زىيارىتى توغرىسىدا مەلۇمات بەرگەن. ئەمما مىكلىلان، "پرېزىدېنت بۇش رەئىس خۇ جىنتاۋنى تەنۋەننىڭ سايلانغان رەھبىرى چېن شۈيبيەن بىلەن سۆھبەت ئۆتكۈزۈشكە ئۈندىدى،" دەپ كۆرسەتتى.

ئامېرىكىنىڭ مۇئاۋىن تاشقى ئىشلار مىنىستىرى زۇلېيك، بېيجىڭ دائىرىلىرىنىڭ چېن شۈيبيەنگە قارشى مەيداندىكى ئۈكتىچىلەرنى كۈتۈۋېلىشى، تەيۋەندە ئىچكى پارچىلىنىشنى پەيدا قىلىشى مۇمكىن، دەپ ئاگاھلاندۇردى. (ئەركىن)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت