Rayis, amérikining xitay bilen bolghan munasiwitide "murekkep amillar" ning barliqini bildürdi

Amérika tashqi ishlar ministiri kondiliza rayis xitayning herbiy qurulushi we maliye- soda siyasetlirige endishe bilen qarawatqanliqini bildürdi.

Amérika birleshme axbarat agéntliqining düshenbe künidiki xewirige qarighanda, kondiliza rayis amérika- xitay munasiwitining asasen yaxshi ikenlikini, biraq ikki terep munasiwitide "murekkep amillar" ning barliqini körsetti.

U, xitayning herbiy qurulushni kücheytiwatqanliqini nezerde tutup, yawrupa birlikining xitaygha qaratqan qoral sétip bermeslik cheklimisini bikar qilishigha qet'iy qarshi turidighanliqini qayta tekitlidi. Emma shuning bilen bir waqitta, xitayning shimaliy koriye yadro kirizisini hel qilish we " térrorchiliqqa qarshi köresh" te amérika bilen hemkarlashqanliqini qarshi alidighanliqini bildürdi.

Xewerde éytilishiche, uning bu sözi, bush hökümitining xitaygha qattiq bir pozitsiyide bolidighanliqining signali iken. Buning aldidila amérika dölet mudapi'e ministiri donald ramisfild,xitayning herbiy tereqqiyatining asiyadiki herbiy tengpungliqqa tehdid élip kelgenlikini körsetken.

Ramisfild shenbe küni asiya bixeterlik yighinida qilghan sözide, xitayning dunyaning nurghun jaylirigha hojum qilalaydighan bashqurilidighan bombini tereqqiy qilduruwatqanliqini bildürüp, héchqandaq dölet xitaygha tehdid salmighan shara'itta, xitayning herbiy küchini téz tereqqiy qildurushidiki meqsitining kishini guman'gha salidighanliqini körsetken.

Ramisfild yene, xitayda puqralarning siyasiy erkinlikining kemchillikini bildürüsh bilen bille, xitayning, kelgüside choqum diktaturluq we ilgharliq otturisida tallashqa düch kélidighanliqini agahlandurghan. (Arzu)