Америка дөләт мудапиә министири хитайни зиярәт қилди


2005.10.17

Хитайға қаттиқ қол сиясәт йүргүзүш тәрәпдарлиқи билән тонулған америка дөләт мудапиә министири доналд рамсфилд, дүшәнбә күни хитайни зиярәт қилиш үчүн йүрүп кәтти. Хәвәрләргә қариғанда рамсфилд зиярәт җәрянида хитай һәрбий даирилири билән икки дөләт һәрбий мунасивәтлири үстидә сөһбәт елип баридикән.

Хитайниң һәрбий хам чотини йилдин - йилға көпәйтиш пилани, америка вә асия әллирини хитайниң истратегийилик йөлиниши вә мәқсиди тоғрисида җиддий әндишигә салмақта иди. Америка дөләт мудапиә министирлиқи хитайниң һәрбий хам чотни көпәйтиш пилани америкиниң асиядики һәрбий күчигә қаритилған, дәп әндишә қилмақта.

Б б с ниң хәвәр қилишичә, америка дөләт мудапиә министирлиқидики әмәлдарлар, рамсфилд зиярәт җәрянида хитай билән зор мәсилиләрдә бөсүш характерлик илгириләш һасил қилиду, дәп қаримайдикән.

Рамсфилд, бейҗиңда хитайниң һәрбий тәрәққият әһвали, хитай рәһбәрлириниң истратегийилик нийити тоғрисида техиму көп учурларға еришишни үмид қилиду. Игилишимизчә, хитай һәрбий даирилири рамсфилдниң бейҗиңда 2 - топчи қисимлар қоманданлиқ мәркизини зиярәт қилишиға қошулған, әмма сәншидики һәрбий қоманданлиқ мәркизини зиярәт қилишиға унимиған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.