FDA Ermek haywanlarning ölümi üstide tekshürüsh élip barmaqta

Amérika yémek-ichmek we dora-dermek bashqurush idarisi(FDA), mayning 1- küni'az dégendimu 4 ming ermek haywan ölümining, xitaydin import qilin'ghan mélamin bilen yuqumlan'ghan ermek haywanlar yémekliki bilen munasiwetlik dégen doklatni delillesh üchün tekshtürüsh élip bériwatqanliqini bildürdi.

Amérikida oxshimaydighan towar markisi bilen minglighan ermek haywan yémekliki sétilghan bolup, yéqinda bularning terkibide plastik matériyallar we ximiyiwiy oghut ishlepchiqirishta ishlitidighan mélamin éléménti bayqalghanliqi üchün mezkur türdiki 150 xil mehsulat yighiwélin'ghan idi.

Melum bolushiche, FDA ensizchilikte qalghan xéridarlardin 17 ming qétim téléfun qobul qilghan, we u kelgen télefunlarni teqqaslap, 8 mingini FDA ning sanliq melumat ambirigha kirgüzgen.

Amérika yéza igilik ministirlikidin kelgen mal doxturi kén pétérsén: "mezkur hadisining ermek haywanat yémekliki bilen munasiwetlik ikenlikini biz téxi delillep bolalmiduq " dégen. Uning bildürüshiche, bu waqit telep qilidighan mesile iken.

Uningdin bashqa, xitaydin kirgüzülgen ösümlük aqsili amérikida bashqa haywanlarni bordash üchünmu ishlitilgen bolup, FDA ning mölcherlishiche, 3 milyon toxu we 6 ming tuyaq choshqa ashu ösümlük aqsili bilen bordalghan.

Munasiwetlik xadimlarning bildürüshiche, mezkur aqsil bilen bordalghan haywanat göshliri terkibide nahayitimu az miqdarda mélamin bolghachqa ademlerning salametlikige zexme élip kélish xetiri intayin towen iken.

Hazir amérika yimek-ichmek we dora-dermek idarisi FDA ning bir qisim tekshürgüchi xadimliri xitayda mélamin bilen yuqumlinishning qandaq yüz bergenliki hemde buning bashqa hadisilerni keltürüp chiqirish éhtimalining bar ‏- yoqliqi üstide xitay hökümiti bilen birlikte meshghulat ilip bériwatidu. (Jüme)