Amérika soda emeldari: xitay-amérika sodisi adil bolmidi

Amérikining mu'awin soda wekili karan batiya yekshenbe küni xitaynijng amérika-xitay soda mesilisini hel qilishta amérika shirketlirige adil mu'amile qilmighanliqini bildürdi.

Karan batiya sözide, xitayning amérika bazirigha kirish arqiliq "zor paydigha érishken" likini, emma xitay amérika shirketlirige bolsa adil we barawer mu'amile qilmay kelgenlikini körsetti. U nöwette, amérika hökümitining soda yoli bilen xitay hökümitini amérika shirketlirige téximu köp bazar da'irisini yaritip bérishke mejburlashqa teyyarliq körüp qoyghanliqini éytti.

Emma u yene, amérikining bu yolni hazir qollanmaydighanliqini yeni xitay shirketlirining amérika bazirigha kirishini hazirche tosimaydighanliqini eskertti. Téxi yéqinda élan qilin'ghan melumatta, amérikining 2005‏- yili xitay bilen bolghan soda passip balanisining 201 milyard dollargha yetkenliki ashkarilan'ghan idi.

Shundaqla amérika soda wekili rob portmen ötken hepte xitayning dunya soda teshkilatining belgilimilirige ri'aye qilghan-qilmighanliqini nazaret qilip turidighan mexsus bir xizmet guruppisining tesis qilinidighanliqini jakarlighan. (Peride)