Amérika bilen xitay béyjingda herbiy söhbet élip bardi

Amérika we xitay béyjingda ikki terep herbiy munasiwitini yaxshilash üchün söhbet ötküzdi.

Amérika birleshme agéntliqining 8 ‏- iyun bergen xewirige qarighanda, amérika dölet mudapi'e ministirliqi yardemchisi rodman xitay azatliq armiyisi bash qomandanliq shtap yardemchisi jang chinshing bilen söhbet élip barghan. Shinxu'a agéntliqi rodmanning sözini neqil keltürüp , " bu qétimqi söhbet ikki terep dölet mudapi'e ministirliqining munasiwitini ilgiri sürüshte muhim rol oynaydu" dep körsetken.

Ötken hepte, amérika dölet mudapi'e ministiri ramisféld sin'gapurda élip bériwatqan ziyariti dawamida , xitaydin, herbiy xirajetni östürüsh jehette élip bériwatqan pilanlirini ochuq ashkarilishini teshebbüs qildi. Ramisféld sözide yene, xitayning pütün dunya miqyasida élip bériwatqan soda munasiwetlirining küchiyishige egiship , herbiy xamchotini ashurushi xitayning menpe'etige uyghun dep körsetti.

Xitay da'iriliri bolsa her yilliq herbiy xamchotining 30 milyard amérika dolliri etirapida ikenlikini bildürüp kelmekte, biraq amérika dölet mudapi'e ministirliqi xitayning bu yilliq herbiy xamchotining texminen 90 milyard amérika dollirigha yétidighanliqini bildürmekte.

Xitay hökümiti, özining soda tereqqiyatida qolgha keltürgen netijilirini bahane qilip, herbiy xirajitini özlüksiz ashurup kelmekte, xitayning bu herikitini özliri üchün tehdit hésablighan rayondiki döletler, yawrupa ittipaqidin xitaygha qaritilghan qoral imbargosini bikar qilmasliqni telep qilmaqta. (Eqide)