Хәлқара кәчүрүм тәшкилати ху җинтавниң испанийидики зияритигә қарши намайиш өткүзидиғанлиқини елан қилди

Хәлқара кәчүрүм тәшкилати җүмә күни баянат елан қилип, хитай дөләт рәиси ху җинтавниң испанийидики зиярити җәрянида хитай кишилик һоқуқ хатирисигә қарши наразилиқ билдүрүш намайиши өткүзидиғанлиқини елан қилди.

Ху җинтавниң испанийә зиярити йәкшәнбә күни башлинип сәйшәнбә күнигичә давамлишиду. Бу җәрянда хәлқара кәчүрүм тәшкилати дөшәнбә күни хитайниң испанийидики баш әлчиханиси алдида йиғилиш өткүзидикән. Бу арида фалунгуң мәзһиби шәнбә күни хитай әлчиханиси алдида намайиш қилидиғанлиқини җакарлиди.

Ху җинтав зиярәт җәрянида испанийә баш министири билән сөһбәт өткүзиду, испанийә парламентини зиярәт қилиду вә хитай - испанийә сода йиғиниға қатнишиду.

Хәлқара кәчүрүм тәшкилатиниң испанийә шөбиси җүмә күни елан қилған баянатида, испанийә баш министири запатерони хитайниң кишилик һоқуқ дәпсәндичиликини көрмәскә селиш билән әйиблиди.

Кәчүрүм тәшкилати испанийә шөбисиниң рәиси естабан белтран, “ испанийә һөкүмити хитайниң кишилик һоқуқни еғир дәриҗидә дәпсәндә қиливатқан дөләт икәнлики, өлүм җазаси, тән җазаси, мәһбусларни харлаш, халиғанчә тутқун қилиш, пуқраларни мәҗбури көчүрүш, ипадиләш әркинлики вә башқа мәсилиләрдә хәлқара келишимләргә хилаплиқ қиливатқанлиқиға сәл қарап кәлмәктә” дәп тәкитлигән.

Баш министир запатерониң әскәртишичә, у хитайға қаритилған қорал- ярақ имбаргосиниң бикар қилинишини қоллайдикән. (Әркин)