Xelq'ara kechürüm teshkilati xu jintawning ispaniyidiki ziyaritige qarshi namayish ötküzidighanliqini élan qildi

Xelq'ara kechürüm teshkilati jüme küni bayanat élan qilip, xitay dölet re'isi xu jintawning ispaniyidiki ziyariti jeryanida xitay kishilik hoquq xatirisige qarshi naraziliq bildürüsh namayishi ötküzidighanliqini élan qildi.

Xu jintawning ispaniye ziyariti yekshenbe küni bashlinip seyshenbe künigiche dawamlishidu. Bu jeryanda xelq'ara kechürüm teshkilati döshenbe küni xitayning ispaniyidiki bash elchixanisi aldida yighilish ötküzidiken. Bu arida falun'gung mezhibi shenbe küni xitay elchixanisi aldida namayish qilidighanliqini jakarlidi.

Xu jintaw ziyaret jeryanida ispaniye bash ministiri bilen söhbet ötküzidu, ispaniye parlaméntini ziyaret qilidu we xitay - ispaniye soda yighinigha qatnishidu.

Xelq'ara kechürüm teshkilatining ispaniye shöbisi jüme küni élan qilghan bayanatida, ispaniye bash ministiri zapatéroni xitayning kishilik hoquq depsendichilikini körmeske sélish bilen eyiblidi.

Kechürüm teshkilati ispaniye shöbisining re'isi éstaban béltran, “ ispaniye hökümiti xitayning kishilik hoquqni éghir derijide depsende qiliwatqan dölet ikenliki, ölüm jazasi, ten jazasi, mehbuslarni xarlash, xalighanche tutqun qilish, puqralarni mejburi köchürüsh, ipadilesh erkinliki we bashqa mesililerde xelq'ara kélishimlerge xilapliq qiliwatqanliqigha sel qarap kelmekte” dep tekitligen.

Bash ministir zapatéroning eskertishiche, u xitaygha qaritilghan qoral- yaraq imbargosining bikar qilinishini qollaydiken. (Erkin)