Bash katip kofiy annan xitaygha qilidighan ziyaritini bikar qildi

B d t bash katipi kofiy annanning shenbe küni bashlinidighan xitay qatarliq döletlerde élip baridighan ziyariti b d t xam choti we " jiddiy siyasi mesililer" sewebidin bikar qilindi.

Kofiy annanning yardemchi bayanatchisi mariya okabéning ashkarilishiche, kofiy annan xitay hökümiti, jenubiy koriye, yaponiye we wyétnam qatarliq döletlerge qilidighan ziyaritining kéchiktürülgenlikini uqturghan. Okabé, kofiy annanning " hel qilishqa tégishlik jiddiy mesililer, bolupmu b d t ning xam chot muzakirisi we jiddiy siyasi mesililer" tüpeylidin bu döletlerge barmasliqni qarar qilghanliqini bildürdi.

Okabé, " jiddiy siyasi mesililer" ning némidin dérek béridighanliqini chüshendürmigen. Kofiy annan xitayni ziyaret qilghan bolsa, béyjing da'iriliri bilen b d t islahati we kishilik hoquq komitétini özgertip qurush qatarliq mesililerni muzakire qilmaqchi idi. Xitay hökümiti kishilik hoquq komitétini özgertip teshkilleshke qarshi turghan döletlerning biri. Emma amérika qatarliq démokratik döletler, kishilik hoquq komitéti xitay, pakistan, zimbabuwi qatarliq kishilik hoquq xatirisi nachar döletler teripidin kontrol qilinip öz rolini yoqatti, dep qarimaqta idi. (Erkin)