Җәнубий асиядики йәр тәврәштә 11 миңдин артуқ адәм өлди

Һиндонезийиниң суматра арили әтрапидики деңизда йүз бәргән дәһшәтлик йәр тәврәш вәқәси сәвәбидин, асияниң җәнубий районлиридики дөләтләр еғир тәбиий апәткә учриди.

Америка бирләшмә ахбарат агентлиқиниң хәвиригә қариғанда, 9 бал әтрапидики йәр тәврәштин пәйда болған деңиз долқунлири серланка, һиндонезийә, һиндистан, тайланд вә малайшийә қатарлиқ алтә дөләттики 11 миңдин артуқ адәмниң өлүшини кәлтүрүп чиқарған. Өлгәнләрниң сани йәнә давамлиқ ашмақта.

Сирланка нөвәттә җиддий һаләт елан қилған болуп, бу дөләттә өлгәнләрниң сани нөвәттә 3500 дин ашқан. Йәр тәврәштин күчәйгән деңиз долқунлири серланкиниң бир кәнтини пүтүнләй вәйран қилған.

Йәр тәврәштин келип чиққан дәһшәтлик деңиз долқунлири йәнә һиндистанниң җәнубий деңиз бойлиридики 3 миңдин артуқ адәмниң өлүшигә сәвәб болған. Тайландтики икки саяһәт орниму апәткә учриған. Тайланд даирилириниң билдүришичә, һазирғичә саяһәт орнидики хадимлар вә саяһәтчиләрдин болуп җәмий 310 дин артуқ адәм һаятидин айрилған. Йәнә нурғун адәмниң из дерики тепилмиған.

Һиндонезийә һөкүмитиниң билдүришичә, һиндонезийидә өлгәнләрниң сани 4422 гә йәткән болуп, бу сан йәнә тез өрлиши мумкин икән. Бу қетимқи йәр тәврәш вәқәси 1900 - йилидин буянқи дунядики 5 - чоң йәр тәврәш вәқәси болуп һесаблиниду.(Арзу)