Déngiz chapquni kélishtin burunla, nyu'orlin shehiridin milyon ahale köchüp chiqqan


2005-08-29
Share

Amérikida 8 - ay ichide "katrina" dep atilidighan dehshetlik déngiz chapquni yüz berdi. Aldi bilen 8 - ayning 26 - küni, amérikining florida shtatidiki déngiz qirghiqigha jaylashqan mey'ami qatarliq sheherlerdin ötken bu chapqun, sa'itige 120 kilométrliq sür'et bilen mey'ami shehiridin ötkende, 6 adem qaza tapqan, bir qisim del - derexler, turalghular, qatnash köwrükliri zexmilen'gen, 1 milyon 500 ming ahale éléktirsiz qalghan, bir munche mehellilerni su bésip kétip, uning ahaliliri öz- ara kéme - qulwaqlar bilen su üzüp yürüp alaqe qilishqa mejbur bolghan idi.

Shuningdin kéyin, amérikining déngiz chapquni heqqide xewer bérish mulazimet merkizi bu heqte yene xewer melum qilip, "katrina" namliq déngiz chapqunining 29 - chisla küni amérikining jenub teripidiki déngiz qoltuqigha jaylashqan nyu-orlin shehirige yétip kélidighanliqini xewer qildi. Bu xewerdin kéyin, luzi'enna, missispi, alabama qatarliq shtatlardiki déngiz qirghaqlirigha jaylashqan yurtlarda, yerlik ahalilarning sep tartip shimalgha qarap köchüshi bashlandi.

"B b s" ning xewer qilishiche, "katrina" chapquni nyu'orlin shehirige yétip kélishtin burun, bu sheherning 80٪ ahalisi alliqachan shimal terpke qarap yolgha chiqip bolghan. Köchüp kétishke ülgürelmigen yaki amalsiz qalghan ahalilarmu sheherdiki musabiqe sariyi qatarliq eng chong we intayin mustehkem sélin'ghan qurulushlargha panalandurulup bolghan.

"Uluq ira géziti" ning xewer qilishiche, "katrina" chapquni yétip kélishtin burunla, nyu-orlin shehirining sheher bashliqi 1 milyon 400 ming sheher ahalisini sheherdin köchürüp chiqishqa buyruq chüshürgen. Shuningdin bashlap shimalgha mangidighan yollarning hemmisi köchüp chiqiwatqan ahalilarning aptomobilliri bilen tolghan. Mushu künlerde déngiz chapquni tüpeylidin, méksika qoltuqida herküni 650 ming bak néfit ishlepchiqiriwatqan karxanilarning ishigha tesir yetken. 7 Jaydiki néfit ayrish zawuti we néft turubiliri ishtin toxtighan.

"Fransiye agéntliqi" ning xewer qilishiche, téksas shtatida özining dachisida aram éliwatqan amérika prézidénti jorji bush déngiz chapquni heqqidiki xewerni anglighandin kéyin, 8 - ayning 28 - küni, pütün amérikini déngiz qoltuqidiki nyu-orlin'gha oxshash sheherlerning xelqini déngiz chapqunidin qutquzushqa chaqirghan.

"Amérika awazi" ning xewer qilishiche, 8 - ayning 29 - küni etigende, "katrina" chapquni sa'itige 230 kilométrliq sür'et bilen nyu-orlin shehrige yétip kélishke bashlighanda, amérikining hawa rayi xadimliri yene, bu qétimqi déngiz chapqunining misli körülüp baqmighan dehshetlik chapqun ikenlikini, hazir bolsa nyu-orlin ahalilirining bextige yarisha, bu chapqunning yönülishide azraq özgirish bolghanliqini, shu sewebtin nyu-orlin shehrige kélidighan apetning derijisi sel töwenligenlikini, emma bu sheher déngiz yüzidin töwen bolghachqa, haman su bésip kétip, shu arqiliq éghir buzghunchiliqqa uchrishi mumkin ikenlikini uqturghan.

"Birleshme agéntliqi" ning xewer qilishiche, "katrin" chapquni nyu-orlin shehirige bügün etigende yétip kelgendin kéyin, eng chong we mustehkem dep hésablap, köchelmeydighan ahalilarni panalandurghan, 77 ming kishilik orunduqi bar musabiqe sariyimu, bu qétimqi dehshetlik chapqun'gha berdashliq bérelmigen. Uning ögzisidin 2 tüshük échilip ketken. Bu qétimqi chapqun'gha uchrighan jayning etrapidiki rayonlardin, peqet luzi'enna shtatining da'irisidila yene 370 ming ahale éléktirsiz qalghan.

"Roytris agénitliqi" ning xewer qilishiche, bu qétimqi "katrina" chapquni amérika tarixida körülüp baqmighan dehshetlik chapqun bolup qalghan. Chapqunning tepsili ehwalini közitiwatqan xadimlerning éytishiche, bu qétimqi "katrina" chapqunigha uchrighan jaylarda körilidighan ziyan texminen 25 milyard amérika dollirigha yétishi mumkin. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet