Pakistandiki yer tewreshte 20 minggha yéqin kishi qaza qildi

Jenubiy asiyada yeni hindistan bilen pakistanning shimaliy qismida shenbe küni yüz bergen chong yer tewresh , az dégende 19 ming 5 yüz kishining jénigha zamin boldi. Mutexessisler bu qétimliq yer tewreshning yüz yildin buyanqi eng küchlük yer tewresh hésablinidighanliqini bildürdi.

Amérika birleshme agéntliqining melum qilishiche, bu yer tewreshning derijisi 7.6 Balgha yetken bolup, yer tewresh asasliqi pakistanning kontrolluqidiki keshmir rayonida yüz bergen. Lékin hindistan terepmu 600 ge yéqin kishining bu yer tewresh apitide qaza qilghanliqini bildürmekte.

Pakistan prézidénti perwez musherref derhal xelq'aradin yardem telep qilip, ularning hazir dora, chédir, tik uchar ayropilan we iqtisadiy yardemge jiddiy éhtiyajliq ikenlikini bildürdi.

Bu arida her qaysi döletler pakistan'gha yardem qilish ishlirini bashlap, amérika, yaponiye, tayland, gérmaniye we awistraliye hökümetliri pakistan'gha 870 ming amérika dolliri yardem qilidighanliqini jakarlidi. Islam'abad da'irilirining bildürishiche, xitay hökümiti pakistan'gha 6 milyon amérika dolliri yardem qilishqa wede bergen.

Xewerge qarighanda, yer tewresh sewebidin pakistan'gha qarashliq bu keshmir rayonidiki on nechche yéza-kent pütünley tüzlinip ketken. Shundaqla ölgenlerning köpinchisi déhqanlar, herbiyler we mektep baliliri iken. Buninggha qoshulup tagh sérilish tüpeylidin bu yerdiki asasliq qatnash yolliri tosulup qalghachqa, bu ehwal qutquzush xizmetlirini téximu qiyinlashturghan. (Peride)