Мәхпий һөҗҗәт: америка хитайдики бир қатар һәрбий қурулушлардин хәвәрсиз қалған


2005-06-09
Share

Америкидики даңлиқ " вашингтон почта гезити" ниң америка ахбарат даирилириниң бир мәхпий доклатидин игилишичә, америкиниң ахбарат даирилири хитайниң өткәнки он йил ичидики бир қисим муһим һәрбий тәрәққиятлирини игилийәлмигән.

Доклатта ийтилишчә, буниң сәвәби, өткәнки он йил ичидә, хитай даирилири өзлириниң һәрбий тәрәққиятлирини һәддин ташқири мәхпий тутқан. Йәнә бир тәрәптин , америка ахбарат даирилири коммунист һөкүмәтниң ичигә ахбарат хадимлирини орунлаштурмиған.

Доклатта көрситилишичә, америка ахбарат даирилири вақтида игилийәлмигән бу тәрәққиятлар, хитайниң узун мусапилиқ нишан тапқучи башқурулидиған бомбини тәрәққий қилдуруши, һоҗумчи су асти парахутини орунлаштуруши вә чәтәлдин илғар қоралларни импорт қилиши қатарлиқларни өз ичигә алидикән.

Хәвәргә қариғанда, бу америка ахбарат даирилириниң хитайдики һәрбий тәрәққиятларға сәл қариғанлиқиниң нәтиҗиси икән.

Америка дөләт мудапиә министири доналд рамисфилд техи өткән шәнбә күни хитайниң һәрбий қурулушини күчәйтишигә болған әндишисини оттуриға қойған иди. У хитайниң дуняниң һәр қандақ йеригә һуҗум қилалайдиған башқурулидиған бомбини тәрәққий қилдуриватқанлиқини көрситип, хитайниң һәрбий қурулушқа зор дәриҗидә мәбләғ селишидики мәқситидин гуманланған. Әмма хитай болса, доналд рамисфилниң сөзини рәт қилип, хитайниң һәрбий хираҗәтни пәқәт бир аз көпәйткәнликини, һәрбий қурулушни күчәйтиш мәқситиниң йоқлиқини билдүргән. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт