Xitaydiki axbarat erkinliki muxbirlarni qoghdash komitétining diqqitini qozghidi


2007.10.19

Béyjing olimpik yighinigha 10 ay qalghan bir mezgilde merkizi nyu yorktiki xelq'ara muxbirlarni qoghdash komitéti jüme küni axbarat élan qilip, xitaydiki axbarat erkinlikige yéqindin diqqet qiliwatqanliqini bildürdi. Mezkur teshkilat aldinqi küni bir qarar maqullap, xitayni öz waqtida olimpik yighini ötküzüshni talashqanda bergen axbarat erkinlikini qoyuwétish heqqidiki wediside turmidi, dep eyiblidi.

Muxbirlarni qoghdash komitéti axbaratta yene, béyjing da'irilirini " dölet mexpiyetliki" we " dölet bixeterliki" ge tehdit sélish jinayiti bilen qolgha alghan türmidiki 29 neper muxbirni qoyup bérishke chaqirip, xelq'ara olimpik komitéti, béyjing olimpik yighinigha meblegh chiqarghan shirketler hem axbarat organliridin öz tesirini ishqa sélip xitaygha bésim ishlitish shundaqla xitayni öz waqtida bergen wediside turushqa ündesh qatarliqlarni telep qildi. Lékin xitay hökümiti xelq'ara teshkilatlarning kishilik hoquq teleplirini olimpikni siyasiylashturghanliq, dep qarimaqta.

Béyjing shehirining mu'awin sheher bashliqi, béyjing olimpik yighini teshkili komitétining mu'awin re'isi lyu jingming, jüme küni olimpik yighini bilen munasiwetsiz siyasiy ishlarni béyjing olimpik yighini bilen baghlimasliq kéreklikini bildürdi. U yene, xitay kishilik hoquq xatirisini aqlap, béyjing olimpik yighinining teyyarliq basquchi junggo kishilik hoquq tereqqiyatini zor derijide algha sürdi, deydu.

Lékin amérika dölet mejlisi we hökümetning xitay ishlar komitéti yéqinda élan qilghan bir doklatta, xitay kishilik hoquq xatirisining yenila nachar, bezi rayonlarda téximu nacharlashqanliqini ilgiri sürgen. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.