Muxbirlarni qoghdash teshkilati xitayni eyiblidi

Merkizi nyu - yorktiki "xelq'ara muxbirlarni qoghdash" teshkilati jüme küni bayanat élan qilip, xitay da'iriliri teripidin " fujuw géziti" ning muxbiri li changchinggha 3 yilliq qamaq jazasi bérilgenlikini eyiblidi shundaqla li changchingni derhal qoyup bérishni telep qildi.

Xitay da'iriliri li changchinggha chet'el tot betlirini " dekke - dükkige salidighan uchurlar" bilen teminligenliki üchün qamaq jazasi höküm qilghan. U ötken seyshenbe küni fujuwdiki bir ottura xelq sot mehkimisi teripidin 3yilliq qamaq jazasigha höküm qilindi. Lining adwukati mo shawpingning fransiye axbarat agéntliqigha eskertishiche, teptish da'iriliri uni " xata we dekke dükkige salidighan uchurlar" ni tarqitish bilen eyibligen.

Muxbirlarni qoghdash komitétining ijra'iye driktori ann koppér, " bu qorqunchluq we adaletsizlerche jazalash ' deydu. U bayanatida lining " derhal we shertsiz qoyup bérilishini" telep qildi. Mo shawpingning fransiye axbarat agéntliqigha ashkarilishiche, li changching xu'ang jin'go heqqide maqale yazghandin kéyin tekshürülüshke bashlighan.

Xiyanetchilikke qarshi turghan kompartiye kadiri xu'ang jin'go, ötken yili 11 - ayda xiyanetchilik bilen eyiblinip muddetsiz qamaq jazasigha höküm qilin'ghan idi. Muxbirlarni qoghdash teshkilatining ilgiri sürüshiche, xitay dunya boyichemuxbir we zhornalistlar eng köp türmige solan'ghan dölet iken. Muxbirlarni qoghdash komitéti xitayni " intérnét düshmini", dep élan qilghan.

Xitay da'iriliri ötken yili " qeshqer edibiyati" ning bash muherriri küresh hüseyinni nurmuhemmet yasinning " yawa kepter" namliq esirini élan qilghanliqi sewebidin 3 yilliq qamaq jazasigha höküm qilghan idi. (Erkin)