Чегрисиз мухбирлар тәшкилати баш муһәррирни урған сақчиларниң җавапкарлиқини сүрүштүрүшкә чақирди


2006-02-07
Share

Хитайниң җеҗяң өлкисидә чиқидиған " тәйҗу кәчлик гезити" ниң муавин баш муһәррири ву шяңху, буниңдин үч ай илгири шу җайдики қатнаш сақчилири тәрипидин қаттиқ таяқ йәп пәйшәнбә күни өлгәндин кейин, мәркизи париждики чегрисиз мухбирлар тәшкилати баянат елан қилип, хитай һөкүмитидин ву шяңхуниң өлүшигә сәвәбчи болған сақчиларни җавапкарлиққа тартишни тәләп қилди.

Мәзкур тәшкилат, "бу вәқә бир җинайи қилмиш, мәмури сәвәнлик әмәс " дәйду. Чегрисиз мухбирлар тәшкилатиниң әскәртишичә, гезитханиға бесип киришкә йитәкчилик қилған қатнаш сақчи әтритиниң башлиқи вәзиписидин елип ташланған болсиму, бирақ у вә униң адәмлири җинайи җавапкарлиққа тартилмиған. Мәзкур тәшкилат баянатида, " җуңго һөкүмити җавапкарларни вәзиписидин елип ташлаш билән болди қилса болмайду. Чүнки бу җәмийәт тәрипидин сақчиларда мухбирларниң һаят - маматиға қарар қилиш һоқуқи бар,дәп қобул қилиниши мүмкин " дәп тәкитлиди.

Өткән йили 10 - айда "тәйҗу кәчлик гезити" мәзкур шәһәрдики қатнаш сақчилириниң маторлуқ қатнаш вастилиридин қалаймиқан пул алғанлиқини паш қилғандин кейин, 50 тәк қатнаш сақчиси тәйҗу кәчлик гезитханиға бесип кирип ву шяңхуни қаттиқ урған. Тәйҗу шәһәрлик һөкүмәтниң баянатчиси, ву шяңхуниң өлгәнликини етирап қилған болсиму, әмма униң өлүш сәвәбини илгирләп тәкшүрүшкә тоғра келиду, деди.

Һөкүмәт даирилириниң әскәртишичә, мунасивәтлик органлар һазирғичә ву шяңхуни урған сақчилар үстидин сүрүштүрүш елип бармиған. Ву шяңхуниң йеқинлири униң таяқ зәрбисидин өлгәнликини билдүрмәктә. Мәркизи ню - йорктики мухбирларни қоғдаш тәшкилатиниң дриктори әнн купер, вуниң өлүми " җуңго мухбирлири дуч келиватқан хәтәрниң қанчилик вәһши икәнликини әслитиду " деди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт