Chégrisiz muxbirlar teshkilati bash muherrirni urghan saqchilarning jawapkarliqini sürüshtürüshke chaqirdi


2006-02-07
Share

Xitayning jéjyang ölkiside chiqidighan " teyju kechlik géziti" ning mu'awin bash muherriri wu shyangxu, buningdin üch ay ilgiri shu jaydiki qatnash saqchiliri teripidin qattiq tayaq yep peyshenbe küni ölgendin kéyin, merkizi parizhdiki chégrisiz muxbirlar teshkilati bayanat élan qilip, xitay hökümitidin wu shyangxuning ölüshige sewebchi bolghan saqchilarni jawapkarliqqa tartishni telep qildi.

Mezkur teshkilat, "bu weqe bir jinayi qilmish, memuri sewenlik emes " deydu. Chégrisiz muxbirlar teshkilatining eskertishiche, gézitxanigha bésip kirishke yitekchilik qilghan qatnash saqchi etritining bashliqi wezipisidin élip tashlan'ghan bolsimu, biraq u we uning ademliri jinayi jawapkarliqqa tartilmighan. Mezkur teshkilat bayanatida, " junggo hökümiti jawapkarlarni wezipisidin élip tashlash bilen boldi qilsa bolmaydu. Chünki bu jem'iyet teripidin saqchilarda muxbirlarning hayat - mamatigha qarar qilish hoquqi bar,dep qobul qilinishi mümkin " dep tekitlidi.

Ötken yili 10 - ayda "teyju kechlik géziti" mezkur sheherdiki qatnash saqchilirining matorluq qatnash wastiliridin qalaymiqan pul alghanliqini pash qilghandin kéyin, 50 tek qatnash saqchisi teyju kechlik gézitxanigha bésip kirip wu shyangxuni qattiq urghan. Teyju sheherlik hökümetning bayanatchisi, wu shyangxuning ölgenlikini étirap qilghan bolsimu, emma uning ölüsh sewebini ilgirlep tekshürüshke toghra kélidu, dédi.

Hökümet da'irilirining eskertishiche, munasiwetlik organlar hazirghiche wu shyangxuni urghan saqchilar üstidin sürüshtürüsh élip barmighan. Wu shyangxuning yéqinliri uning tayaq zerbisidin ölgenlikini bildürmekte. Merkizi nyu - yorktiki muxbirlarni qoghdash teshkilatining driktori enn kupér, wuning ölümi " junggo muxbirliri duch kéliwatqan xeterning qanchilik wehshi ikenlikini eslitidu " dédi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet