Чегрисиз мухбирлар тәшкилати: җуңго асия димукратийә гәвдисиниң рак кесили
2006.05.02
Мәркизи париждики чегрисиз мухбирлар тәшкилати сәйшәнбә күни доклат елан қилип, хитайниң ипадә әркинлики хатирисини тәнқид қилди вә хитайни асиядики "димукратийә гәвдисиниң рак кесили", дәп әйиблиди.
Чегрисиз мухбирлар тәшкилати, бейҗиң һөкүмити хәлқ аммисини иҗтимаий җиддийчилик әкс әттүрүлгән хәвәрләрни аңлаштин тосимақта вә чәтәллик жорналистлар вә йәрлик мухбирларни қолға алмақта, дәп тәнқидлигән. Җуңго асиядики "димукратийә гәвдисиниң рак кесили", дәп тәкитлигән чегрисиз мухбирлар тәшкилати, "ипадә әркинлики кәң көләмдә бузғунчилиққа учримақта," дәйду.
Чегрисиз мухбирлар тәшкилатиниң әскәртишичә, "иҗтимаий турақсизлиққа дуч кәлгән җуңго һөкүмити учурни контрол қилиш йолини талливалған. Мәтбуат өз өзини чәкләшкә мәҗбур қилинип, интернет тазилашқа учриған, чәтәл мәтбуатлирини чәткә қеқишқа башлиған."
Доклатта мухбирларни қолға елиш мәсилиси давам қиливатқанлиқини әскәртип, чәтәл мәтбуатлири билән һәмкарлашқучиларниң зәрбә бериш нишаниға айлинип қалғанлиқини тәкитлигән. Чегрисиз мухбирлар тәшкилатиниң әскәртишичә, бу йилниң башлири хитай бойичә аз дегәндә 32 мухбир түрмигә ташланған. " Түрмигә ташлаш истибдатларниң мухбирларни җимиқтуруштики әң өткүр қорали," дәп тәкитлигән мәзкур тәшкилат, бу җәһәттә җуңго қатарлиқ дөләтләрниң әһвалида йилдин йилға чоң өзгириш болмиғанлиқини билдүргән. (Әркин)
Мунасивәтлик мақалилар
- Хитай дунядики ахбарат әркинлики болмиған дөләтләр қатариға кирди
- Google Хитайда рухсәтсиз мәшғулат елип барғанлиқини рәт қилди
- Чегрисиз мухбирлар тәшкилати баш муһәррирни урған сақчиларниң җавапкарлиқини сүрүштүрүшкә чақирди
- Дуня мәтбуатчилар җәмийити хитай даирилирини әйиблиди
- Мухбирларни қоғдаш тәшкилати хитайни әйиблиди