Chégrisiz muxbirlar teshkilati naraziliqi bildürüsh pa'aliyiti élip bardi

6 - Awghust düshenbe küni béyjingda, xitay hökümiti 2008- yilliqi béyjing olimpikidin burun wede qilghan axbarat erkinliki bermidi, dep erkin metbu'at terghibatchi teshkilati naraziliqi bildürüsh pa'aliyiti élip bardi. Emma xitay saqchiliri pa'aliyet meydan'gha kelgen muxbirlarni qamal qildi.

Mezkur naraziliq pa'aliyiti, xelq'ara olimpik komitéti prézidénti jeku'is rojjining béyjing ziyariti jeryanida élip bérilghan.

Chégrisiz muxbirlar teshkilati ezaliridin teshkil tapqan naraziliq bildürgüchiler, koyza-kishenlerdin yasalghan olimpik chembiriki chüshürülgen maykilarni kiyiship, béyjing olimpik pilan komitétining aldidiki piyadiler köwrikide namayish qildi.

Bash shtabi parizh shehirige jaylashqan chégrisiz muxbirlar teshkilat, xitay olimpikke sahibxana bolush hoquqni qolgha keltürüsh aldida, axbaratni erkin qoyuwétish toghrisida bergen wedisige qarimay, yenila axbarat erkinlikni qattiq qamal qiliwatqan bolup, muxbirlar, siyasiy öktichiler, qarishi pikirde bolghuchilar we intérnétta maqal élan qilghuchilarni üzlüksiz qolgha élip kéliwatqanliqini bildürdi.

Chégrisiz muxbirlar teshkilati ezasi winsént brisél: "biz bu yerge olimpikini bayqut qilish chaqiriqini terghib qilghini kelmiduq, belki siyasiy mehbuslarni qoyuwétish, intérnétqa bolghan chekleshni we radi'o dolqunlirini tosush ishlirini ayaghlashturushta birlikte küch chiqirish chaqiriqi qilghili kelduq" deydu.

Halbuki, saqchi formisi kiygen we puqrache kiyin'gen xitay saqchilar kélip, köwrüktin chüshüwatqan muxbirlarni türtüp ularning aldini tosqan we kimlik kinishkilirini tartiwalghan.

Melum bolushiche, muxbirlar, béyjing olimpik ishxanisining aldidiki meydan'gha yighiwélin'ghan we ikki sa'ettin kiyin, héchqandaq chüshendürüsh bérilmeyla qoyuwétilgen. Chégrisiz muxbirlar teshkilatining bildürüshiche, hazir xitayda 32 neper muxbir we 50 neper torda maqal élan qilghuchilar türmide iken. (Jüme)