Дуня банкиси африқа дөләтлиригә қәрз бериш мәсилисидә хитайниң банкилирини әйиблиди

Америкида нәшр қилинидиған малийә вақит гезитидә ейтилишичә,йеқинда, дуня банкиси президенти павл волфовитз (Paul Wolfowitz) хитай банкилириниң африқа дөләтлиригә қәрз бериштә, мәзкур җайлардики кишилик һоқуқ вә муһит өлчәмлиригә сәл қараватқанлиқини көрситип, хитай һөкүмитини әйиблигән.

Малийә вақит гезитидә берилгән хәвәрдә ейтилишичә, дуня банкиси президенти павл волфовитз (Paul Wolfowitz) франсийә лес ико гезити мухбириниң зияритини қобул қилғанда хитайдики чоң банкиларниң 2003 ‏- йилидин буян иҗра қилиниватқан хәлқара малийә һәмкарлишиш принсипини көзгә илмай хәлқара банкилар оттурисидики ортақ өлчәмгә хилаплиқ қиливатқанлиқини йәни пул қәрз бериштә иҗтимаий вә муһит өлчимигә бойсунмайватқанлиқини алаһидә тәкитлигән. У йәнә , хитай һөкүмитиниң африқа дөләтлири билән мунасивәт орнитишта, пәқәт мәзкур җайдики енергийә мәнбәсини вә базарлиринила көздә тутуватқанлиқини билдүрди.

Павл волфовитз (Paul Wolfowitz) ниң билдүрүшичә, дуня банкиси мәзкур мәсилиләр һәққидә хитай даирилири билән бивастә алақилишип сөһбәт елип барған һәмдә хитай һөкүмитидин бу һәқтә тездин бирликкә келишни тәләп қилған. Лекин хитай һөкүмити дуня банкисиниң бухил тәнқидини қобул қилалмайдиғанлиқини билдүргән.

Хитай ташқи ишлар министерлиқиниң баянатчиси лю җйәнчав " дуня банкисиниң бу хил тәнқидини қобул қилалмаймиз, бизниң африқа дөләтлири билән елип бериватқан содимиз баравәр принсип асасида давамлишиватиду " дәп билдүргән. (Меһрибан)