Kofi ennan b d t ning yéngi kishilik hoquq orgini qurushning zörörlikini tekitlidi

B d t ning bash sékritari kofi ennan, b d t ning yipyéngi we da'imiy bir kishilik hoquq orgini qurup chiqip, dunyaning her qaysi jaylirida yüz bériwatqan éghir kishilik hoquq depsendichiliklirining aldini élish kéreklikini tekitlidi.

Amérika birleshme axbarat agéntliqining xewirige qarighanda, kofi ennan b d t kishilik hoquq komitétining jenwede échiliwatqan yilliq kishilik hoquq yighinida söz qilip, " 53 dölettin terkib tapqan kishilik hoquq komitéti, dunyada kishilik hoquq depsenchiliklirining yüz bérishini tosiyalmidi. Bolupmu, sudanning darfor rayonida" dédi.

U yene, nöwettiki kishilik hoquq komitétining barghansiri inawitini yoqutup, b d t ning pütün séstimisigha kölenggü élip kelgenlikini, shunga peqet qismen islahat élip bérishning yiterlik bolmaydighanliqini körsetti.

Kofi ennan buning aldida, kishilik hoquq xatirisi yaxshi döletlerdin yéngi bir kishilik hoquq orgini qurup chiqip, nöwettiki kishilik hoquq komitétining ornigha dessitishni otturigha qoyghan. Xewerde iytilishiche, eger kofi ennanning teshebbusi boyiche yéngi kishilik hoquq orgini qurulsa, u halda bu organning b d t bixeterlik kéngishi bilen oxshash imtiyazlargha ige bolishi mumkin iken.

Bu arida, xitay hökümiti b d t ni islah qilishni qollisimu, biraq islahatning waqtini békitishke qarshi turidighanliqini bildürdi. B d t ning bash sékritari kofi ennan özi otturigha qoyghan, kishilik hoquq orgini qurushni öz ichige alghan bir qatar islahatlarning bu yil 9 - ayda échilidighan b d t ning aliy yighinida maqullinishini ümid qilmaqta. (Arzu)