Kishilik hoquq teshkilati xitayni bu jehettiki xatirisini yaxshilashqa ündidi

Xitay, yéngidin teshkillen'gen birleshken döletler teshkilatining kishilik hoquq komitétigha eza bolup kirgendin kéyin, nyo-yorktiki "xitay kishilik hoquq teshkilati" bayanat élan qilip, xitay gerche bu komitétqa eza bolsimu, lékin uning kishilik hoquqni yaxshilash jehette chong ilgirlesh hasil qilalishigha közi yetmeydighanliqini bildürdi.

Roytérs agétnliqining xewer qilishiche, "xitay kishilik hoquq teshkilati" gerche xitaydin chong netijilerni kütüp ketmigen bolsimu, lékin xitayning b d t ning bu teshkilatigha eza bolghanliqi yüzisidin we dunyada yuqiri kötürüliwatqan ornidin paydilinip kishilik hoquqni ilgiri sürüshke köp küch chiqirishi kéreklikini tekitlidi.

Seyshenbe küni xitay b d t kishilik hoquq komitétining ezaliqigha saylan'ghandin kéyin, xitay tashqi ishlar ministirliqining bayanatchisi lyu jyenchaw, xitayning bu orun'gha érishkenlikidin pexirlinidighanliqini hemde buningdin kéyin xelq'ara kishilik hoquq qanunlirigha asasen xitaydiki kishilik hoquq weziyitini yaxshilashqa téximu köp küch chiqiridighanliqini wede qilghan idi.

Eslidiki b d t kishilik hoquq komitéti, sudan, zimbabowi we bérmigha oxshash kishilik hoquq xatirisi nachar bolghan nurghun döletlerning eza bolushi sewebidin tenqidke uchrap, eza döletlerni qayta békitish zörüriyige duch kelgen idi. Emma bu qétim yéngidin tüzülgen bu komitétqimu yenila xitay, kuba, pakistan we se'udiy erebistan'gha oxshash kishilik hoquq jehette köp tenqid qiliniwatqan döletler eza boldi.

Amérika hökümiti b d t kishilik hoquq komitétining qayta islahat qilinishida ching turghan dölet bolup, hetta yéngidin tüzülgen bu komitétning ezaliqighimu özini körsetmidi. (Peride)