Америка, б д т хәвпсизлик кеңишидики даимий әзалар санини көпәйтишни қоллиди

Америка, кам дегәндә японийә қатарлиқ икки дөләтниң б д т хәвпсизлик кеңишиниң даимий әзалиқиға көпәйтип сайлинишини қоллиди. Әмма америка, йеңидин сайлинидиған даимий әзаларниң рәт қилиш һоқуқи болушиға қарши туридикән шундақла аз дегәндә үч дөләтни хәвпсизлик кеңишиниң адәттики әзалиқиға көпәйтип сайлашни үмид қилидикән.

Америка ярдәмчи ташқи ишлар министири николас бурнис, "даимий әзаларни икки, адәттики әзаларни иккидин үчкичә көпәйтишни қоллаймиз," дәп көрсәтти. Бурнисниң тәкитлишичә, америка хәвпсизлик кеңишидики 15 әзаниң 19 яки 20 гә көпәйтилишини халайдикән. Бу америкиниң хәвпсизлик кеңишидики әзалар санини көпәйтиш пиланини тунҗи қетим ашкарлиши болуп һесаблиниду.

Америка японийә, германийә, бразилийә вә һиндистан қатарлиқ төт дөләтниң хәвпсизлик кеңишидики әзалар санини 25 кә көпәйтиш пиланиға қизиқмайдикән. Әмма японийиниң даимий әзалиқини қоллайдикән.

Хитайлар японийиниң даимий әзалиқиға қарши чиқип, хәвпсизлик кеңишидики рәт қилиш һоқуқимизни қоллинимиз, дәп агаһландурған. Хитай баш министири вен җябав, "японийә хәвпсизлик кеңишигә даимий әза болуш лаяқитигә игә әмәс," дегән иди. Әмма японийә ташқи ишлар министири мачимураниң ашкарилишичә, америка ташқи ишлар министири кондилиза райис, америкиниң японийә қатарлиқ икки дөләтни хәвпсизлик кеңишиниң даими әзалиқиға көпәйтип сайлашни тәшәббус қилидиғанлиқини уқтурған. (Әркин)