Б д т америкини гүәнтанамо лагирини тақиветишкә чақирди


2006.05.19
Share on WhatsApp
Share on WhatsApp

Б д т ниң тән җазасиға қарши туруш комитети, америка тән җазасиға хатимә бериш һәрикитиниң бир қисими сүпитидә кубаниң гүәнтанамо арилидики тутқунлар лагирини тақиветиш керәк, дәп қарайдиғанлиқини елан қилди. 10 Кишилик тәрәпсиз мутәхәссисләр гурупписидин тәшкил тапқан мәзкур комитет җүмә күни виянада баянат елан қилип, америкини гүәнтанамо вә чәтәлдики гуманлиқ террорчиларни тутуп туруватқан барлиқ мәхпий түрмиләрни тақиветишкә чақирди.

Баянатта мәзкур комитет, афғанистан вә ирақтики тутуп туруш лагирлирида америка әскәрлири вә ялланма хадимларниң мәһбусларға тән җазаси бәргәнлики һәққидики хәвәрләргә диққәт қиливатқанлиқини тилға алди вә барлиқ шәкилдики тән җазалирини тохтитиш, үзүл -кесил тәкшүрүш елип беришни тәләп қилди.

Нөвәттә гүәнтанамодики лагирда 17 нәпәр уйғур мусапири тутуп турулмақта. Америка дөләт мудапиә министирлиқиниң әскәртишичә, бу уйғурлар " дүшмән җәңчиси" дәп бекитилгән булсиму, лекин бу уларниң 3 - бир дөләткә орунлаштурулмайдиғанлиқидин дирәк бәрмәйдикән. Америка һөкүмити бу кишиләр хитайға қайтуруп берилсә тән җазасиға учраш яки өлүм җазасиға һөкүм қилиниш мумкинчилики бар, дәп қариғанлиқтин уларни хитайға қайтурушни рәт қилмақта.

Б д т тән җазасиға қарши туруш комитетиниң мутәхәссиси манфрид новак, өткән йили 11 - айда хитай вә уйғур аптоном районида тәкшүрүш елип барғандин кейин, тән җазасиниң хитайда омумйүзлик әһвал икәнлики вә буниң асаслиқи уйғур, тибәт, фалунгоң муритлириға қаритилғанлиқини елан қилған. Лекин йеқинда гүәнтанамодин қоюп берилгән вә албанийигә орунлаштурулған 5 нәпәр уйғур яш өзлириниң гүәнтанамода тән җазасиға учримиғанлиқини билдүрди.

Б д т илгири америкини гүәнтанамодики лагирни тақиветишкә чақирған болсиму, лекин буш һөкүмити б д т ниң бу тәлипини рәт қилған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.