Б д т мусапирлар комитетиниң комиссари хитайни зиярәт қилди

Бирләшкән дөләтләр тәшкилати мусапирлар комитетиниң алий дәриҗилик комисссари антонио гутеррес дүшәнбә күни хитайдики зияритини башлиди. Бу мусапирлар комитети комиссариниң 1997‏- йилидин буян тунҗи қетим хитайға зиярәткә бериши болуп һесаблиниду.

Гутерресниң баянатчисиниң билдүрүшичә, у хитайда хитайниң сода министирлиқи, җамаәт хәвпсизлик министирлиқи вә ташқи ишлар министирлиқи қатарлиқ орунларниң юқири дәриҗилик әмәлдарлири билән көрүшидикән. Шундақла икки тәрәп сөһбәттә чәтәлликләрниң хитайға кириши вә у йәрдә панаһлиқ тилиши һәмдә хитайниң африқидики инсанпәрвәрлик ярдәм паалийәтлиригә қатнишиш мәслилири музакирә қилинидикән.

Хәвәрдә көрситилишичә, шималий корийилик мусапирларниң мәслисиму сөһбәттики муһим темиларниң бири икән. Бирләшкән дөләтләр тәшкилати хитайға киргән шималий корийиликләрниң хитай һөкүмити тәрипидин қоғдилиши лазимлиқини оттуриға қойиду. Әмма хитай һөкүмити шималий корийә һөкүмитини рәнҗитмәслик үчүн бу мусапирларни пәқәт иқтисадий көчмәнләр дәп қарап, уларға сиясий панаһлиқ беришни рәт қилип кәлди.

Мәзкур комитетниң мөлчәрлишичә, нөвәттә хитайдики шималий корийилик мусапирларниң сани 100 миңдин ашидикән. Әгәр улар хитай һөкүмити тәрипидин байқилип қалса, шималий корийигә қайтуруп берилиши мумкин. Б д т мусапирлар комитетиниң комиссари антонио гутеррис хитайдики мәзгилидә йәнә, " хәлқара мусапирлар қануни" ниң хитайчә нусхисиниң тарқитилиш мурасимиға қатнишиду. Бу китабни мусапирлар комитети билән хәлқара парламент оюшмиси бирликтә түзүп чиққан.(Пәридә)