Bérmadiki herbiy hakimiyetke qarshi dunya ning herqaysi döletliride keng kölemlik namayishlar ötküzülmekte


2007-10-06
Share

Shenbe küni bérma ning herbiy hakimiyitige qarshi dunya ning nurghunlighan döletliride naraziliq namayishliri élip bérildi. Xelq'ara kechürüm teshkilatining uyushturushi bilen asiya, yawrupa we shimaliy amérika döletliride élip bérilghan naraziliq namayishlirigha minglighan kishi qatnashqan.

Ötken hepte bérmada, bu dölettiki herbiy hakimiyetke qarshi tinchliq bilen élip bérilghan naraziliq namayishning qanliq basturolghanliqigha qarshi xelq'ara jama'etning naraziliqi künséri kücheymekte. Bolupmu, bérma hökümiti, naraziliq namayishi'i jeryanida, minglighan kishining bérma bixeterlik qisimliri teripidin tutulghanliqini itrap qilghandin kéyin, xelq'ara ning naraziliqi téximu kücheygen.

Amérika, eger bérmadiki herbiy hakimiyet xelq'ara jama'etning bérmada démokratik islahat élip bérish toghrisidiki teleplirini qobul qilmisa, b d t ning bérmigha qarshi iqtsadiy jaza yolgha qoyushi üchün, tirishidighanliqini bildürdi.

Bérma hökümiti 26‏- we 27‏- séntebir künliri élip bérilghan basturushta, 10 kishining ölgenlikini we 2100 kishining qolgha élin'ghanliqini bildürdi. Lékin bérma öktichi teshkilatliri basturush jeryanida 200 din artuq namayishchining ölgenlikini we 6000 gha yéqin namayishchining qolgha tutulghanliqini bildürmekte.

Xelq'ara jama'etning bérmadiki basturushqa qarshi bolghan naraziliqi künséri küchiyiwatqan bir peyitte, xitayning b d t diki wekili, bérmadiki weziyet xelq'ara ning we rayonning tinchliqi we bixeterliki üchün tehdit hésablanmaydu dep, körsetti.

Xitayning b d t diki wekili wang guwangya jüme küni bergen bayanatida, "xelq'ara bésim bérmadiki weziyetning téximu murekkeplishishige seweb bolidu. B d t bixeterlik kéngishi bérma mesilsige mes'uliyetchanliq bilen mu'amile qilishi kérek" dégen.

Köpchilikke melum bolghandek, xitay bérma herbiy hakimiyitining dunyadiki eng yéqin ittipaqdishi hésablinidu. (Ömer qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet