Xitayning "bölünishke qarshi turush qanuni" amérika bilen teywenning diqqitini qozghidi

Roytérs axbarat agéntliqi, amérika bilen teywen xitayning "bölünishke qarshi turush qanuni" chiqirish tirishchanliqini bi'aramliq bilen küzütiwatqanliqini xewer qildi.

Roytérs axbarat agéntliqining bildürüshiche, chiqirilish aldidiki "bölünüshke qarshi turush qanuni" da, eger teywen musteqilliqini jakarlisa, qoralliq hujum qilish belgilinidighan yaki belgilenmeydighanliqi hazirche melum emesken. Xongkongdiki jonggo axbarat agéntliqining xewer qilishiche, xitay chong quruqluqidiki qanunshunas shü zongdé, mezkur qanunning teywen'ge qaritilghanliqini biraq, " tibet bilen sherqiy türkistanni öz ichige alidighan yaki almaydighanliqini, qanun chiqirish organlirining chüshendürüshige toghra kélidu," dep körsetken.

Xitay xelq qurultiyi da'imiy komitétining 25 - dékabirdin 29 - dékabirghiche échilidighan 13 - nöwetlik yighini, "bölünüshke qarshi turush qanun layihisini" közdin kechüridu. Eger mezkur qanun layihisi bu qétimqi yighinda maqullansa, xelq qurultiyining kéler yili 3 - ayda ichilidighan memliketlik yighinining testiqlishigha sunilidu.

Roytérs axbarat agéntliqi, amérikining mezkur qanun teywen boghuzidiki hazirqi weziyetni téximu jiddileshtürüwétishidin ensireydighanliqini bildürdi. "Bölünüshke qarshi turush qanun layihisi" merkizi gérmaniyidiki dunya Uyghur qurultiyining tenqidige uchrighan. Qurultay ijra'iye komitétining re'isi alim séytoff, "xitay hökümiti Uyghurlargha qaritilghan basturushni qanunlashturushqa urunmaqta," dep eyibligen idi. (Erkin)