Amérika "döletni parchilashqa qarshi turush qanuni" gha qarshi turidighanliqini tekrarlidi

Xitayni ziyaret qiliwatqan fransiye bash ministiri rafarin, peyshenbe küni béyjingda fransiyining talash - tartishtiki "döletni parchilashqa qarshi turush qanuni" gha qarshi emeslikini jakarlighandin kéyin, amérika hökümiti shu küni teywen'ge qaritilghan mezkur qanun'gha qarshi turidighanliqini tekrarlidi.

Fransiye axbarat agéntliqining xewer qilishiche, amérika tashqi ishlar ministirliqidiki emeldarlar " fransiyining öz köz- qarishigha ige bolush hoquqi bar..... Emma bizning qarishimizche "döletni parchilashqa qarshi turush qanuni" chiqirish paydisiz," dep tekitligen. Washin'gtondiki da'iriler, béyjingdiki bayanatida fransiyining mezkur qanun'gha qarshi emeslikini tekitligen rafarinning sözige inkas qayturup, fransiyining bayanati yawropa ittipaqigha yarashmighanliqini ilgiri sürdi.

Rafarin, peyshenbe küni xitay bash ministiri wén jyabaw bilen birge élan qilghan bayanatida, " döletni parchilashqa qarshi turush qanuni fransiyining meydanigha tamamen zit emes," dep körsetken idi. Rafarin, béyjingda yawropa ittipaqining qoral- yaraq imbargosini bikar qilish üchün tirishidighanliqini bildürgen. Emma wén jyabaw, imbargo bilen kishilik hoquq mesilisini öz- ara baghlashqa qarshi turdi. Ularning söhbiti xitaydiki ölüm jazalirini shundaqla emgek bilen üzgertish lagirlirini öz ichige alghan her qaysi témidiki mesililerge chétilghan. Xitay hökümiti shu küni fransiye bilen soda sommisi 3 milyard 200 milyon dollar kélidighan 30 dane yoluchilar ayrupilani sétiwélish toxtami imzalidi. (Erkin)