خىتايغا قاراتقان ئىككى كۈنلۈك زىيارىتىنى ئاياغلاشتۇرغان، ئەنگىلىيە باش مىنىستىرى جۇردون براۋن، زىيارىتىنىڭ ئىككىنچى كۈنىدە، مۇھىتنى قوغداشتا ئۆز-ئارا ھەمكارلىقنى كۈچەيتىش مەسىلسىنى، خىتاي رەھبەرلىرى بىلەن سۆھبەت تېمىنىڭ ئاساسلىق مەزمۇنى قىلغان.
ئۇ، شەنبە كۈنى شاڭخەيدە بەرگەن باياناتىدا، خىتاي ۋە ئەنگىلىيىنىڭ، مۇھىتنى قوغداشتا بىر-بىرى بىلەن ھەمكارلىشىش مەسىلىسىدە يېڭى بىر دەۋرگە ئاياق باسقانلىقىنى بىلدۈرگەن.
خەۋەرلەرگە قارىغاندا، ئەنگىلىيە باش مىنىستىرى، جۈمە كۈنى خىتاي رەھبەرلىرى بىلەن ئېلىپ بارغان سۆھبەتلىرىدە، ئىككى دۆلەت ئوتتۇرسىدىكى ئىقتىسادىي مۇناسىۋەتلەرنى تېخىمۇ كۈچەيتىش مەسىلىسىنى تەكىتلىگەن.
ئەنگىلىيە باش مىنىستىرى جوردون براۋننىڭ خىتاي زىيارىتى ھارپىسىدا، خەلقئارا كىشىلىك ھوقۇق تەشكىلاتلىرى شۇنىڭدەك ئۇيغۇر ۋە تىبەت تەشكىلاتلىرى، ئۇنىڭدىن بۇ قېتىمقى زىيارىتى جەريانىدا، كىشىلىك ھوقۇق مەسىلسىنى چوقۇم ئوتتۇرىغا قويۇشىنى ۋە خىتاي ھۆكۈمىتىگە 2008- يىللىق ئولىمپىك تەنھەرىكەت يىغىنىغا ساھىبخانىلىق قىلىش ھوقۇقى بېيجىڭغا بېرىلگەندە، كىشىلىك ھوقۇقنىڭ خىتايدىكى ۋەزىيىتىنى ياخشىلاش توغرىسىدا خەلقئارا جامائەتكە بەرگەن ۋەدىسىگە ئەمەل قىلىشىى ئۈچۈن بېسىم ئىشلىتىشىنى تەلەپ قىلغان ئىدى.