Xitay hökümiti prézidént bushni pütün dunyani sorashqa térishiwatidu dep eyiplidi

Amérika birleshme agéntliqining xewer qilishiche, xitay hökümiti amérikida ötküzülidighan prézidént saylimi harpisida, amérika prézidénti bushni pütün dunyani bashqurushqa uruniwatidu dep eyiplidi.

Xitayning mu'awin bash ministiri chen chichen teripdin en'glizche chiqidighan xitay kündilik gézitide élan qilin'ghan bir obzorda éytilishiche, iraqning amérika qisimliri teripidin ishghal qilinishi xelq'ara térrorchiliqqa qarshi ittipaqni parchilap, dunyadiki diniy we milliy toqunushlarni téximu keskinleshtüriwetken.

Xewerlerge qarighanda, chen chichen ning bu tenqidi, xitay hökümitining hazirghiche amérika prézidént saylimi toghrisida pikir bayan qilmasliq we prézidént kandidatliri heqqide ipade bildürmeslik prinsipidin waz kechkenlikini körsitidiken.

Amérika birleshme agéntliqining bildürüshiche, gerche xitay hökümiti amérika bashchiliqida élip bériliwatqan xelq'ara térrorchiliqqa qarshi urushni qollawatqan bolsimu, lékin prézidént bushning meqsetliridin endishe qilidiken. Xitay hökümiti shundaqla amérikining ottura we jenubiy asiyada künséri köpiyiwatqan herbiy mewjudiyitidin qattiq endishe qilidiken.

Xewerde éytilishiche, xitay mu'awin bash ministiri chen chichenning prézidént bush heqqide tosattin bundaq bir ipade bildürüshining sewebi téxi melum emes, emma, amérika - xitay munasiwetliri yéqindin buyan bolupmu, ikki dölet arisida soda mesilsisde otturigha chiqqan ixtilaplar we amérika hökümitining gu'antanamoda tutup turuliwatqan Uyghurlarni xitaygha qayturmasliq qarari tüpeylidin yirikleshmekte. (Qanat)