Президент буш асиядики зияритини башлиди

Америка президенти җорҗи буш, сәйшәнбә күни японийигә йетип келип, шәрқий асиядики японийә, җәнубий корийә, хитай вә моңғулийиләргә қилидиған зияритини башлиди. У, зиярәт җәрянида җәнубий корийиниң босан шәһиридә өткүзүлидиған асия - тинч окян иқтисади һәмкарлиқ тәшкилатиниң башлиқлар йиғиниға қатнишиду.

Күнтәртип бойичә президент буш чаршәнбә күни японийә баш министири койзуми билән көрүшидикән.

Хитай ташқи ишлар министирлиқиниң баянатчиси лю җйәнчав, бушниң бейҗиңни зиярәт қилиш җәрянида хитай тәрәп билән кишилик һоқуқ мәсилисини өз ичигә алған кәң темилар бойичә пикир алмаштуридиғанлиқини билдүрди.

Лю җйәнчавниң әскәртишичә, президент буш бейҗиңдики мәзгилидә бу йәрдики бир черкавға берип ибадәт қилидикән. Ақ сарайниң мәслиһәтчиси дан бартлет, президент бушниң зиярәт җәрянида хитай даирилири билән кишилик һоқуқ мәсилиси бойичә созлишидиғанлиқини билдүргән.

Мәркизи вашингтондики уйғур демократийә вә кишилик һоқуқи фонди җәмийитиниң ашкарилишичә, мәзкур җәмийәтниң рәиси рабийә қадир ханим, президент буш йолға чиқиштин илгири америка һөкүмитигә хәт йезип, президент буштин уйғурларға өлүм җазаси бериш, сияси мәһбуслар, тән җазаси вә пиланлиқ туғут қатарлиқ мәсилисиләрдә хитайға бесим ишлитишни тәләп қилған. (Әркин)