Буш хитайда демократийә вә диний әркинликни тәкитлиди
2005.11.20
19 -Ноябир күни хитайдики зияритини башлиған америка президенти җорҗ в буш йәкшәнбә күни хитай дөләт рәиси ху җинтав билән көрүшүп, хитай һөкүмитиниң пуқралириға техиму көп демократийә вә диний әркинликни бериши керәкликини тәкитлиди.
Президент буш йәкшәнбә күни ху җинтав билән көрүшүштин бурун бейҗиңдики бир черкавға берип, бу йәрдики диний хадимлар билән бирликтә диний рәсмийәтләрни өтигән. Андин у ху җинтав билән учрашқандин кейинки мухбирларни күтивелиш йиғинида, хитайниң пуқралириға техиму көп демократийә вә диний әркинликни бериши керәкликини тәкитләш билән биргә, хитайниң бу йолда йәнә бесишқа тегишлик узун мусаписиниң барлиқини билдүргән.
У сөзидә йәнә, "хитайниң иқтисадий ислаһат җәрянида, хитай рәһбәрлириму әркинликкә қаралған ишикниң қия ечилғанлиқини һәмдә бу ишикниң әмди йепилмайдиғанлиқини байқиди. Хитай хәлқиниң иқтисадий гүллинишигә әгишип, уларниң сиясий әркинликкә болған чақириқиму шунчә юқири көтүрүлиду" деди.
Хитай дөләт рәиси ху җинтав хәлқ сарийида буш билән көрүшүп болғандин кейин, хитайниң аллибурун демократийә әркинликидин бәһримән болғанлиқини ейтти. Униң сөзигә қарита, америка ташқи ишлар министири кондолиза райс, хитай гәрчә мәлум илгириләшләрни һасил қилған болсиму, әмма хитайниң нөвәттики түзүлмисиниң риқабәтни тәрғип қилидиған демократик түзүлмә әмәсликини әскәртти.
Буш хитай зияритини башлаштин сәл бурун, ақ сарай шәнбә күни, президент бушниң хитайдики зияритидә бейҗиң һөкүмитигә диний әркинлик, сода вә хәлқ пули билән долларниң тегишиш нисбити мәсилилиридә бесим ишлитидиғанлиқини әскәртип, шуниң үчүн хитайниң һәр қайси ахбарат вастилирида униң зияритини толуқ бериши керәкликини күчлүк тәләп қилған иди.
Әмма хитай һөкүмитиниң зувани болған шинхуа агентлиқи, бушниң демократийә вә диний әркинлик тоғрисидики чақириқлириға һечқанчә орун бәрмәстин, икки тәрәпниң қандақ ортақлиқларға келишкәнликини алаһидә тәкитлиди. (Пәридә)
Мунасивәтлик мақалилар
- Америка хитайдики сиясий өктичиләргә көңүл бөлмәктә
- Америка әдлийә министири хитайни зиярәт қилди
- Кишилик һоқуқ тәшкилати президент буштин кишилик һоқуқни муһим мәсилиләр қатарида оттуриға қоюшни тәләп қилди
- Буш билән ро му- хюн, корийә уруш тохтитиш келишими орниға тинчлиқ келишимини дәсситишкә қошулди
- Буш хитай һөкүмитини хәлққә техиму көп әркинлик беришкә чақирди