Bush xitayda démokratiye we diniy erkinlikni tekitlidi

19 -Noyabir küni xitaydiki ziyaritini bashlighan amérika prézidénti jorj w bush yekshenbe küni xitay dölet re'isi xu jintaw bilen körüshüp, xitay hökümitining puqralirigha téximu köp démokratiye we diniy erkinlikni bérishi kéreklikini tekitlidi.

Prézidént bush yekshenbe küni xu jintaw bilen körüshüshtin burun béyjingdiki bir chérkawgha bérip, bu yerdiki diniy xadimlar bilen birlikte diniy resmiyetlerni ötigen. Andin u xu jintaw bilen uchrashqandin kéyinki muxbirlarni kütiwélish yighinida, xitayning puqralirigha téximu köp démokratiye we diniy erkinlikni bérishi kéreklikini tekitlesh bilen birge, xitayning bu yolda yene bésishqa tégishlik uzun musapisining barliqini bildürgen.

U sözide yene, "xitayning iqtisadiy islahat jeryanida, xitay rehberlirimu erkinlikke qaralghan ishikning qiya échilghanliqini hemde bu ishikning emdi yépilmaydighanliqini bayqidi. Xitay xelqining iqtisadiy güllinishige egiship, ularning siyasiy erkinlikke bolghan chaqiriqimu shunche yuqiri kötürülidu" dédi.

Xitay dölet re'isi xu jintaw xelq sariyida bush bilen körüshüp bolghandin kéyin, xitayning alliburun démokratiye erkinlikidin behrimen bolghanliqini éytti. Uning sözige qarita, amérika tashqi ishlar ministiri kondoliza rays, xitay gerche melum ilgirileshlerni hasil qilghan bolsimu, emma xitayning nöwettiki tüzülmisining riqabetni terghip qilidighan démokratik tüzülme emeslikini eskertti.

Bush xitay ziyaritini bashlashtin sel burun, aq saray shenbe küni, prézidént bushning xitaydiki ziyaritide béyjing hökümitige diniy erkinlik, soda we xelq puli bilen dollarning tégishish nisbiti mesililiride bésim ishlitidighanliqini eskertip, shuning üchün xitayning her qaysi axbarat wastilirida uning ziyaritini toluq bérishi kéreklikini küchlük telep qilghan idi.

Emma xitay hökümitining zuwani bolghan shinxu'a agéntliqi, bushning démokratiye we diniy erkinlik toghrisidiki chaqiriqlirigha héchqanche orun bermestin, ikki terepning qandaq ortaqliqlargha kélishkenlikini alahide tekitlidi. (Peride)