Президенти җурҗ буш ирақ сиясити үчүн сөһбәт башлиди

Америка президенти җурҗ буш дүшәнбә күни төт йилға йеқин бир вақитдин бери елип бериватқан ирақ сиястини өзгәртиш үчүн үч күн давамлишидиған сөһбәтләргә башлиди.

Президент буш бүгүн америка ташқи ишлар минстирлиқиға берип, сиясий вә дипломатийә җәһәтләрдә қандақ тәдбирләр елиш тоғрисида мәзкур минстирлиқ хадимлири билән мәслиһәтләшкән. Андин ақсарайда мутәхәссисләр вә пенсийигә чиққан генераллар билән учрашқан.

Ақсарайниң баянатчиси тони сну бүгүн мухбирларға бәргән баянатида, президент буш 25‏- дикабир күнигичә ирақ сияситидә қандақ өзгиришләр болидиғанлиқиға қарар беришни үмид қилиду, деди. Хәвәрләргә қариғанда президент буш һөкүмити қисқа бир вақит үчүн ирақтики америка һәрбий қисимлириниң санини көпәйтиш вә ирақтики сиясий, миллий вә диний гуруһлар билән мунасивәтләрни қайтидин күздин кәчүрүш қатарлиқ тәдбирләрни елишни ойлашмақта.

Сиясий мулаһизчиләрниң ейтишичә, президент буш қандақ тәдбир елиштин қәтинәзәр бу тәдбирни башқилар билән мәслиһәтләшкән һалда елишқа тиршмақта. Шуңа у һәм америкидики түрлүк сиясий көз қарашқа игә кишиләрниң һәмдә чәт дөләт әрбаблиридиниң тәвсийә вә тәклиплирини елиш үчүн җиддий паалийәт елип берийватиду.

Президент буш мушу мәқсәт билән өткән һәптә, ирақтики шийиләрниң әң муһим сиясий рәһбәрлириниң бери болған абдуләзиз әлһәким, америкидики җумһурийәтчи вә демократ партийси әзалиридин тәшкил тапқан ирақ тәкшүрүш гурупписи әзалири әнгилийә баш минситири тони билийә вә дөләт мәҗлиси ахбарат вә ташқи мунасивәтләр комитетлириниң әзалири билән учрашти. (Қанат)