Буш оттура шәриқтики зияритидә тенчлиқниң муһимлиқини тәкитлиди

Америка президенти җорҗ буш, сәуди әрәбистанниң падишаһи абдулла билән сөһбәтлишиватқан бир пәйттә , америка дөләт мәҗлиси сәуди әрәбистанға 20 миляр америка доллири қиммитидә илғар типлиқ қорал сетип бериш пиланини елан қилди.

Америка мәзкүр қорал сетип бериш пиланиға асасән, сәуди әрәбистанни , нишанни тоғрилап атидиған башқурулидиған бомба сестимиси яки һушяр бомба дәп атилидиған 900 данә бомба вә башқа техникилиқ әслиһәләр билән тәминләйду. Америка даирилири қорал сетип беришкә даир пиланини елан қилиш билән тәң йәнә, бу пиланға қарита парламент әзалириниң 30 күнгә қәдәр қаршилиқ билдүрүш имтиязи болидиғанлиқини тәкитлиди.

Хәвәрләргә қариғанда , президент буш сәуди әрәбистан падишаһи абдуллаға өзиниң алдинқи һәптә исраилийә вә пәләстин рәһбәрлири билән елип барған сөһбитиниң мәзмунини йәткүзүидикән, америка һөкүмәт хадимлириниң билдүрүшичә, президент буш йәнә , иранниң оттура шәрқ райониниң муқимлиқиға елип келидиған тәһдити шуниңдәк оттура шәрқ райониниң техиму көп әркинликкә еһтияҗлиқ икәнлики һәққидики мәсилиләр үстидиму тохтилидикән.

Буш оттура шәрқтики зиярити давамида, районниң тенчлиқи пүтүн дуня тенчлиқиға мунасивәтлик муһим нуқта икәнликини тәкитләп, пәләстин ‏- исраилийә оттурисидики ихтилапларниң тезрақ һәл қилиниши, ирақ вәзийитиниң яхшилиниши вә афғанистан билән пакистандики әлқаидә күчлиригә тақабил туруш мәсиллирини оттуриға қойди. Әмма исраилийә қошуни 15 ‏- январ күни ғәззәдә һәрбий һәрикәт қозғап, 17 пәләстинликни етип өлтүрди. Охшаш күндә афғанистанниң кабул шәһиридә талибанлар тәрипидин елип берилған өзини өлтүривилиш характирлик һуҗумда 8 адәм қаза қилди.