Amérika prézidénti jorji bushning ottura sherq ziyariti ayaghlashti

Amérika prézidénti jorji bushning ottura sherq ziyariti bügün (charshenbe küni) ayaghlashti. Bush ziyaritini bashlash aldida turghanda uchur wastilirigha, özi 2009 ‏- yili wezipidin ayrilishti'in burun isra'iliye bilen pelestin otturisida tinchliq kélishimi imzalinishini ümid qilidighanliqini, buning üchün ereb ellirini qollashqa chaqiridighanliqini bildürgen idi.

Roytrs agéntliqining 1 ‏- ayning 16 ‏- küni misirning sharm el sheyix shehiridin xewer qilishiche, amérika prézidénti jorji bush bu qétimqi ottura sherq ziyaritining axirqi békiti bolghan misirning qizil déngiz buyidiki sharm el sheyix shehirige kelgende, amérikining dosti misir prézidénti hüsni mubarek bilen körüshti. Bush uninggha hazir iranning tehditi isra'iliye-pelestin tinchliqigha tesir yetküziwatqanliqini körsetti. Se'udi erebistan tashqi ishlar ministiri sawt el faysal iranning xelq'ara qanunlargha ri'aye qilishi lazimliqini tekitlidi.

Aqsarayning bayanatchisi dana périnoning éytishiche, prézidént bush se'udi erebstanigha kélip padishah abdulla bilen körüshkende, hazir bir barol néftning bahasi 100 amérika dollirigha yetkenlikini , buning bilen téz ösüwatqan dunyaning iqtisadigha tesir yitiwatqanliqini körstish bilen birge, opék döletlirini néfit mehsulatini ashurush we néfit bahasini töwenlitishke chaqirghan.