Xu jintaw, prézidént bush bilen énérgiye we soda mesilisini muzakire qilidu

Yuqiri derijilik xitay emeldarlirining tekitlishiche, xitay dölet re'isi xu jintaw amérikidiki ziyariti jeryanida prézidént bush bilen énérgiye we soda mesililirini sözlishidiken.

Xu jintaw 6 - séntebirdin 8 - séntebirgiche dawamlishidighan ziyaret pilani boyiche syatilgha baridu.7 - Séntebirde prézidént bush bilen aqsarayda uchrushidu we yél uniwérsititida nutuq sözleydu.

Xitay tashqi ishlar ministirliqining emeldari xé yaféyning tekitlishiche, xu jintaw amérikiliqlarda "xitay tinchliqperwer küch", dégen obraz yaritish üchün tirishidiken. Emma xé yaféy, soda we énérgiye mesilisi söhbet küntertipidiki muhim témilar, dep körsetti. Xu jintaw bilen bush otturisidiki qétimliq söhbiti xelq pulining qimmiti we amérikining xitay bilen bolghan sodidiki qizil reqimi qatarliqlarni öz ichige alidiken.

Amérikining xitay bilen bolghan sodidiki qizil reqimi ötken yilila 160 milyard dollar bolup, bush hökümiti amérika dölet mejlisining bu mesilidiki bésimigha duch kelmekte.

Xitay tashqi ishlar ministirliqining emeldari xé yaféyning eskertishiche, ikki dölet rehbiri énérgiye mesilisini muzakire qilidiken. Xé yaféy, xitayning amérika bilen énérgiye jehettiki hemkarliqqa qiziqidighanliqini bildürdi.

Yéqinda jonggo déngiz okyan shirkitining amérika yunikal néfit shirkitini sétiwélish pilani siyasi seweblerdin ongushsizliqqa uchrighan idi. (Erkin)