Amérika, xitay rehberliri téléfonda shimaliy koriye we darfur mesilisini muzakire qildi

Amérika prézidénti jorji bush düshenbe küni xitay dölet re'isi xu jintaw bilen téléfonda shimaliy koriye yadro mesilisi we sudanning darfur rayonidiki insanperwerlik krizisini muzakire qildi.

Aqsaray bayanatchisining eskertishiche, prézidént bush latwiye paytexti rigada ötküzülidighan NATO bashliqlar yighinigha qatnishish üchün kétiwétip xu jintaw bilen téléfonda yuqiriqi mesililerni muzakire qilghan. Bush "xitayning shimaliy koriye we darfur mesilisige oxshash xelq'ara zor mesilislerde yétekchilik rol oynishini" telep qilghan.

Aqsaray bayanatchisi gordon jondroning eskertishiche, "ikki dölet rehbiri xanoyda ötküzülgen asiya tinch okyan iqtisadiy hemkarliqi bashliqlar yighini jeryanida ötküzgen söhbitini esligen we xitay - amérika hemkarliqini ilgiri sürüshke qoshulghan".

Amérika bilen xitay b d t xewpsizlik kéngishining qararlirini ret qilish hoquqigha ige döletler. Xitay amérikining sudan'gha imbargo qoyush teklipini üzlüksiz ret qilip kelgen idi. Lékin sudan yéqinda b d t ning darfur rayonigha tinchliq saqlighuchi qisimlar ewetishige qoshuldi. Lékin shimaliy koriye yadro pilani amérika üchün yenila bash aghritidighan mesile bolup kelmekte.

Shimaliy koriye yadro mesilisini muzakire qilghuchi döletler düshenbe küni béyjingda qayta toplinishqa bashlighan. Amérika söhbet wekili kristofir xill shu küni béyjinggha yétip bardi. Prézidént bush rigada NATO ning bashliqlar yighinigha qatnishishtin burun éstoniyini ziyaret qilidu. (Erkin)