Prézidént bush pat arida, xujingtawni téksastiki dachisigha teklip qilmaqchi

Xewerlerdin melum bolushiche, prézidént jorj bush, xu jingtaw bilen élip baridighan söhbiti jeryanida, xitayning xelq pulining qimmitini tengshesh siyasiti jehette élip barghan islahatigha yuqiri baha bérip, xitayni xelq pulining qimmitini yenimu bir qedem yuqiri kötürüshke righbetlendüridiken.

Amérikida chiqidighan soda zhornilida élan qilin'ghan maqalida körsitilishiche, xitay xitay pulining qimmitini tengshesh qararini élan qilishtin bir ay burun, amérika maliye ministirliqining ministiri shuningdek amérika dölet mejlisining ezaliri xitayning bu qararini maxtighan .

Gerche metbu'atlarda, yuqirida tilgha élin'ghan mesililer prézidént bushning xu jingtaw bilen élip baridighan söhbitining asasliq témisi qilip körsitilgen bolsimu, amma siyasiy istratégiyilik mesillilermu ikki dölet rehbiri muzakire qilidighan da'iridin müstesna emes iken, yeni bush bilen xu jingtaw , shimaliy koriye yadro quralliri mesililiri üstide söhbet ötküzüp, xitaydin , shimaliy koriyige bésim ishlitishini yeni shimaliy koriyining yadro qorallirini ishlitishtin waz kéchishke kapaletlik bérishini telep qilidiken.

Béyjing uniwérsitéti xelq'ara munasiwetler inistitutining mu'awin bashliqi ja chinggo, amérika xitay munasiwiti omumiy jehettin yaxshi, prézidént bush hökümiti , xitay hökümiti bilen öz - ara yéqin munasiwette bolup, ikki terep alaqisini yaxshi tengshep kelmekte, bolupmu ikki terep munasiwitining tereqqiyatigha ehmiyet bermekte, gerche ikki terepning iqtisadiy munasiwitide azraq sürkilishler bolsimu, amma bu xil sürkilishler, siyasiy menpe'etning aldida öz rolini yoqitishqa mejbur, digen.

Ja chinggo sözide yene "eger prézidént bush, re'is xu jingshtawni özining dachisini ziyaret qilishqa teklip qilsa, bu amérika terepning qizghin mu'amilisining ipadisi hemde ikki terep munasiwitige alahide mu'amile tutqanliqidin dérek béridu" dep bildürüsh bilen birge yene " emma xitay ـ amérika munasiwitide yenila bir qisim mesililer mewjüt" dep tekitligen.

Bu arida ikki terep munasiwitidiki ziddiyetler heqqide toxtalghan közetküchiler , xitayning teywen mesiliside amérikining meydanini hergiz özgertelmeydighanliqini bildürmekte. (Eqide)