Кишилик һоқуқ тәшкилати президент буштин кишилик һоқуқни муһим мәсилиләр қатарида оттуриға қоюшни тәләп қилди


2005.11.17

Мәркизи ню йорктики кишилик һоқуқни көзитиш тәшкилати чаршәнбә күни, президент бушқа хәт йезип, хитай дөләт рәиси ху җиңтав вә баш министир вен җябавлар билән учрашқанда, кишилик һоқуқ мәсилисини муһим мәсилиләр қатарида оттуриға қоюшни тәләп қилди.

Кишилик һоқуқни көзитиш тәшкилати, "йеқинқи йиллардин бери , кишилик һоқуқ мәсилисиниң хитай - америка сөһбитидики орни көринәрлик дәриҗидә аҗизлимақта, дәп қарайду вә шундақла буниңдин биарамлиқ һес қилмақта " дәп тәкитлигән. Әмма мәзкур тәшкилат, президент бушниң японийидә хитайни сиясий әркинликкә чақирған нутуқиға иҗабий баһа берип, бу нутуқ америка һөкүмитиниң хитай мәсилисидә кишилик һоқуққа қайтидин көңүл бөлүшкә башлиғанлиқиниң ипадиси болуп қелишни үмид қилған.

Президент буш чаршәнбә күни тәйвән демократийисини махтиған, хитай даирилирини пуқралириға техиму көп сиясий әркинлик беришкә чақирған иди. Әмма хитай һөкүмити пәйшәнбә күни президент бушниң чақириқини ибариси силиқ сөзләр билән рәт қилди. Хитай ташқий ишларминистирлиқиниң баянатчиси лю җйәнчав, пәйшәнбә күни мухбирларға " җуңго хәлқи қанун бойичә диний ибадәт әркинликини өз ичигә алған демократийә вә әркинликниң барлиқ шәкиллиридин бәһриман боливатиду " деди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.