Америка президенти җорҗ буш оттура шәрқ зияритини давамлаштуруватиду

Америка президенти җорҗ буш 1 ‏- айниң 8 ‏- күни түркийә президенти абдулла гул билән көрүшкәндин кейин, оттура шәрқ зияритини башлиған иди. Буш бу қетим исраилийә, пәләстин, әрәб хәлпилики, кувәйт, сәуди әрәбистани, мисир қатарлиқ дөләтләрдә сәккиз күн зиярәттә болиду.

Җорҗ буш оттура шәрқ зияритини башлаштин бурун, 'әл һура телевизийиси' ниң мухбириниң сориған суаллириға җаваб бәргәндә, у өзиниң бу қетимқи зияритиниң мәқситини исраилийә билән пәләстиндин ибарәт бу икки дөләтниң тинч өтүшини илгири сүрүш вә америкиниң бу райондики иттипақдашлирини бу икки дөләтниң тинч өтүшини қоллашқа қайил қилиштин ибарәт дәп баян қилған иди.

Җорҗ буш мухбирниң, 'сиз өзиңизниң президентлиқ мәзгили ахирлашқичә, мустәқил пәләстин дөлитини қуруш әмәлгә ашидиғанлиқиға ишинәмсиз' дегән суалиға 'һеч болмиғанда пәләстин дөлитиниң шәкиллинишигә ишинимән, гәрчә бу дөләтниң органлири, бихәтәрлик қошунлирини қуруш наһайити мурәккәп болсиму' дәп җаваб бәргән иди. У йәнә мухбирниң 'оттура шәрқ хәлқи сизни қандақ президент дәп хатирилиши мумкин' дегән суалиға җаваб бәргәндә 'оттура шәрқ хәлқи мини сиясий ғәризи үчүн бигуна адәмләрни өлтүридиған әсәбий радикалчиларға қарши туридиған, оттура шәрқниң парлақ кәлгүсигә ишинидиған, йәрлик хәлқниң әнәнисигә һүрмәт қилидиған президент дәп хатириләйдиғанлиқиға ишинимән' дәп җаваб бәргән иди. (Вәли)