Президент буш күвәйттики зияритини башлиди

Президент буш җүмә күни парис қолтуқидики күвәйткә йетип келип, бу қетимқи оттура шәрқ сәпиридә зиярәт қилидиған 5 әрәп дөлитиниң 1 - бекитидики зияритини башлиди.

Президент буш бүгүн күвәйт әмири сабах билән сөһбәт өткүзүши мумкин. Бушниң бу қетимқи сәпириниң мәқсиди өзиниң оттура шәрқ тинчлиқ пилани үчүн әрәб дөләтлириниң қоллишини қолға кәлтүрүш шундақла иранниң районда күндин - күнгә күчийиватқан тәсир күчи тоғрисида райондики дөләтләр билән пикир бирлики һасил қилиштур.

Президент буш күвәйт сәпиридә йәнә , америкиниң күвәйттики бир һәрбий базисини көздин кәчүрүши вә бу йәрдә ирақтики америка армийисиниң қомандани петройис вә ирақтики америка баш әлчиси райен крокерлар билән көрүшүши мумкин.

Президент буш күвәйт зияритини башлаштин бурун исраилийә билән пәләстинни зиярәт қилип, икки тәрәп рәһбәрлири билән тинчлиқ келишими вә пәләстин дөлитиниң қурулуш мәсилиси үстидә сөһбәт елип барған. Буш, исраилийә билән пәләстинниң бу йил ичидә тинчлиқ келишими имзалап, пәләстин дөлитиниң қурулушиға үмидвар қарайдиғанлиқини билдүрмәктә. У, исраилийә пайтәхти телавифтики бин гориан айрудурумидин айрилиштин бурун, исраилийә президенти шимон пәрәс вә баш министир ахуд олмартларға 'тинчлиққа еришиш пурсити наһайити зор' дәп көрсәтти. Буш бу сәпиридә күвәйттики зияритидин кейин, бәһрәйн, әрәп бирләшмә хәлипилики, сәуди әрәбистанларда зиярәттә болиду. (Әркин)