Prézidént bush xitayni "koniche usulda tepekkur qilish" din waz kéchishke chaqirdi

Amérika prézidénti jorji bush, béyjing da'irilirini xitay herbiy tereqqiyat qurulushini öz ichige alghan bir qatar mesililerde " koniche usulda tepekkur qilish we heriket élip bérish" tin waz kéchishke chaqirdi. Bush peyshenbe küni élan qilghan " milliy bixeterlik istratégiyisi doklati"da, xitay herbiy chiqimining mewhümliki " pütün rayonda we dunya boyiche " endishe qozghimaqta, dep tekitligen.

Amérika merkizi axbarat idarisi yéqinda élan qilghan doklatida, xitayning sherqiy asiya rayonidiki amérika qisimlirigha tehdit séliwatqanliqini otturigha qoydi. Amérika dölet mudapi'e ministirliqining tekitlishiche, amérika xitayning latin amérikisi bilen bolghan herbiy alaqisidin jiddiy bi'aram bolmaqta. Prézidént bushning yer shari bixeterlik mesililirige chétilghan milliy istratégiye doklati, xitay dölet re'isi xu jintaw kéler ayda amérikini ziyaret qilmaqchi boluwatqan bir chaghda élan qilindi.

Shu küni aq sarayning dölet xewpsizlik meslihetchisi stiwén xardléy axbarat élan qilish yighinida, teywen boghizidiki herbiy toqunushning hemme terepke ziyan salidighanliqini agahlandurghan. Prézidént bush, xitayni teb'iy bayliqi mol emma kishilik hoquqi xatirisi we dölet sijili nachar ellerni qollash bilen eyiblidi. U, xitayni islahat we échiwétishke chaqirip, " chünki bu yol xitay rehberlirining qanuni éhtiyaji we xitay puqralirining erkinlik arzusini qanduridu " dédi. (Erkin)