Prézidént bush gu boshyongni qobul qilip, teywen mesilisidiki siyasitini tekitlidi

Amérika prézidénti jorji bush xitay merkizi herbiy ishlar komitétining mu'awin re'isi gu boshyongni aq sarayda qobul qilip, amérika , teywen boghuzining hazirqi mewjut halitini bir tereplimilik özgertishke qarshi turidu, dédi. U, amérika -junggo herbiy munasiwitini kücheytish we xitayning shimaliy koriye mesiliside amérika bilen hemkarlishishini ümid qilghan.

Ikki terep söhbiti 10minut dawam qildi. Gu boshyong esli aq saraygha amérika prézidéntining dölet xewpsizlik meslihetchisi stipan xardléyning teklipi boyiche bardi. U, xardléy bilen söhbet élip bériwatqanda prézidént bush söhbet meydanigha gu boshyong bilen körüshüp qoyush üchün kirgen.

Gu boshyong, yéqinqi 5 - 6 yildin béri amérikini ziyaret qilghan xitayning eng yuqiri derijilik herbiy rehbiri. U herbiy ishlar komitétida xu jintawdin kéyin turidighan 2 nomurluq shexs. Prézidént bush gu boshyonggha amérikining "junggo - amérika 3 qoshma axbaratigha hörmet qilish we bir junggo siyasiti özgermidi," dep tekitligen.

Gu boshyong stipan xardléydin amérika - teywen munasiwitining derijisini östürmeslik, teywen'ge qoral ‏- yaraq sétip bermeslikni telep qilghan. Bu arida xitay dölet mudapi'e ministirliqi, junggo bilen amérikining bu yil ichide hawayda birleshme qutquzush maniwéri ötküzüshke qoshulghanliqini élan qildi.

Xitay herbiy da'irilirining eskertishiche, déngiz üstide birleshme qutquzush maniwérini xitay déngiz armiyisining bir piloti bu yil 9 - ayda amérikini ziyaret qilghanda amérikining gherbiy déngiz sahili yaki hawayda ötküzmekchi iken. Xitay terepning ziyaritidin kéyin mushu yil ichide amérikining bir déngiz armiye piloti xitayni ziyaret qilmaqchi. (Erkin)