Чечәнистан пидаилири мустәқиллиқ күришини техиму күчәйтидиғанлиқини җакарлиди


2005-03-09
Share

Чечәнистан пидаилириниң рәһбири арслан мәшәдоф русийә даирилири тәрипидин өлтүрүлгәндин кейин, чечәнистан пидаилири чаршәнбә күни арслан мәшәдофниң вапати бәдилигә русийигә қарши мустәқиллиқ күрәшлирини техиму күчәйтидиғанлиқини җакарлиди.

Русийиниң федерал бихәтәрлик идариси сәйшәнбә күни арслан мәшәдофниң, улар толстой юрт шәһиридә елип барған алаһидә һәрбий һәрикитидә өлтүрүлгәнликини җакарлап, буниң русийиниң террорчилиққа қарши урушта тоғра йолни бесиватқанлиқини намайән қилидиғанлиқини ейтқан иди.

Русийә даирлириниң мәлум қилишичә, русийә алаһидә әтрити сәйшәнбә күни мәшәдоф йошурунған өйгә бөсүп кирип, өйниң игиси йәни мәшәдофниң йирақ туққинини тутуп чиққан һәмдә униңдин мәшәдофниң қәйәрдиликини сориғинида, у киши қаршилашмастинла мәшәдофниң йәр асти өйидә икәнликини ейтқан.

Русийә вәкили мәшәдоф билән бирәр саәтчә сөһбәтләшкән болсиму, әмма арслан мәшәдоф тәслим болушни рәт қилған. Андин русийә алаһидә әтрити мәшәдоф турушлуқ җайға 4 данә гиранат ташлиған.

Америка ахбарат агентлиқиниң хәвиригә қариғанда, толстой юрт шәһиридики аһалиләр вәқә йүз бәргәндә бош партлаш авазини аңлиғанлиқини һәмдә мәшәдофниң партлашта өлгәнликигә гуман билән қарайдиғанлиқини билдүрди. Чүнки, мәшәдофниң җәситидә партлашқа учриғандәк зәхминилишләр көрүлмигән.

Арслан мәшәдофниң лондонда турушлуқ вәкили әхмәд закайеф чаршәнбә күни мәшәдофниң һәқиқәтән қаза қилғанлиқини ениқлап, мәшәдоф һаят болсун яки болмисун, уларниң русийигә қарши мустәқиллиқ күришидә һечқандақ өзгириш болмайдиғанлиқини җакарлиди. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт