Америка хитайниң үч хил тоқумичилиқ мәһсулатиға чәклимә қойди

Америка һөкүмити хитайниң үч хил тоқумичилиқ мәһсулатини импорт қилишқа чәклимә қоюшни қарар қилғандин кийин, хитай һөкүмити йәкшәнбә күни буниңға қаттиқ наразилиқ билдүрди.

Ройтирс агентлиқиниң хәвиригә қариғанда, америкиниң сода министири карлос гутерис, америкиниң хитайдин импорт қилинидиған пахта рәхттин ишләнгән көйнәк, иштан, пахта вә яки полистирдин ишләнгән ич кийимләргә бирдәк сан чәклимиси қоюлидиғанлиқини җакарлиған. Бу үч хил тоқумичилиқ мәһсулатниң америка базириға киридиған сани бу йил 7.5٪ Тин артуқ көпәйсә болмайдикән.

Карлос гутерисниң билдүрүшичә, буш һөкүмитиниң өткән айда елип барған тәкшүришигә қариғанда, бу қарар америкиниң тоқумичилиқ санаитини сақлап қелиш үчүн елинған.

Хитайниң сода министирлиқи бу мунасивәт билән баянат елан қилип, америкиниң бу қарариниң дуня сода тәшкилатиниң бәлгилимисигә хилап икәнликини билдүрди һәмдә дуня сода тәшкилатиниң рамкиси ичидә, йәниму илгирлигән һалда тәдбир қоллиниш һоқуқини сақлап қалидиғанлиқини көрсәтти.

Дуня сода тәшкилатиниң бәлгилимиси бойичә, әгәр дөләтләрниң базири еғир дәхли- тәрузға учриған шараитта, мунасивәтлик тәдбир қоллинишиға рухсәт қилиниду.

Америкиниң билдүрүшичә, бу йил 1 - айда тоқумичилиқ мәһсулатлириға қаритилған сан чәклимиси бикар қилинғандин буян, хитайдин америка базириға киргән тоқумичилиқ мәһсулатлириниң сани 1500 пирсәнт ашқан. (Арзу)